[28-09-2015] O Concello de Ames, a través da concellaría de Urbanismo, Obras Públicas e Servizos Básicos, está realizando obras de pintado na calzada da Travesía do Pedregal, para restablecer o dobre sentido de circulación nesta rúa. Estes traballos de pintado desenvolveranse ao longo de toda a xornada de hoxe. Esta vía quedará aberta ao tráfico a última hora do día. Deste xeito, o goberno municipal cumpre o compromiso que adoptou na precampaña cos veciños e veciñas desta rúa. A eliminación do dobre sentido de circulación realizouse tralas obras de reurbanización que se executaron nesta travesía no pasado mes de marzo.
O alcalde de Ames, José Miñones, e o concelleiro de Urbanismo, Obras Públicas e Servizos Básicos, Blas García, estiveron esta mañá na Travesía do Pedregal para comprobar que os traballos de pintado desta rúa se están realizando correctamente. As autoridades municipais estiveron acompañados do inspector da Policía Local, José Antonio Rodríguez.
A través do repintado da calzada desta rúa vaise a recuperar o dobre sentido de circulación nesta vía que dá acceso dende a avenida da Maía ao centro de saúde e á Casa da Cultura de Bertamiráns. Estes traballos desenvolveranse ao longo da xornada de hoxe. A rúa quedará aberta ao tráfico a última hora do día.
Segundo manifesta o rexedor municipal “o restablecemento do dobre sentido de circulación nesta rúa foi un compromiso adoptado en precampaña cos veciños e veciñas do Pedregal, xa que lle solicitaron ao Concello que se puidera circular en ambos sentidos por este lugar. Deste xeito damos cumprimento a ese compromiso que adoptamos con esta comunidade veciñal”.
Co restablecemento do dobre sentido de circulación as prazas de aparcamento, que había en batería, pasan a ser en liña. Ademais, dende o goberno municipal destacan que están traballando para habilitar novas zonas de aparcamento no entorno da Travesía do Pedregal, xa que son necesarias para todas as persoas que son usuarios/as do centro de saúde e da Casa da Cultura de Bertamiráns.
Contido relacionado
La Voz de Galicia: "La vía de acceso al centro de salud de Bertamiráns recupera el doble sentido"
El Correo Gallego: "Volve o dobre sentido de circulación ao Pedregal, que muda o aparcamento"