[19-06-2015] Esta semana remataron os programas municipais de reforzo educativo e de inglés (PET-B1) postos en marcha pola Oficina Municipal de Información Xuvenil (OMIX). Este mércores, 17 de xuño, a concelleira de Xuventude, Isabel González, entregou os diplomas do curso de inglés ao alumnado do Milladoiro. Este xoves, 18 de xuño, fixo o mesmo co alumnado do curso de inglés de Bertamiráns. Ademais, este xoves, 18 de xuño, tamén rematou o programa de reforzo educativo. Neste dous programa participaron un total de 85 alumnos.
Programa de reforzo educativo
Por outra banda, o pasado xoves, 18 de xuño, remataron as clases do programa municipal de reforzo educuativo que se desenvolveron dende o pasado mes de xaneiro. As clases desta iniciativa desenvolvéronse os mércores no IES do Milladoiro e os xoves no IES de Ames, en Bertamiráns, en horario de 16:30 a 18:30 horas. Nos dous centros inscribíronse un total de 55 alumnos.
Con esta iniciativa preténdese favorecer o desenvolvemento de actividades que proporcionen aos alumnos unha formación integral e, ao mesmo tempo, promover o esforzo compartido da comunidade educativa na procura do éxito escolar e na redución do abandono temperán dos estudos.
Dentro deste programa impartíronse dúas áreas de coñecemento: Ciencias e Letras, baixo a filosofía de “aprender facendo”. Fomentouse a comprensión das ideas relacionadas cos contidos traballados na aula, repasando temáticas concretas ou reforzando aqueles puntos que o alumno tiña máis dificultade para asimilar.
Dende o pasado mes de xaneiro dous grupos de 15 alumnos participaron nun curso de inglés destinado a formar aos alumnos e alumnas para a realización do exame Preliminary English Test (PET-B1). Esta actividade tivo unha duración de 90 minutos diarios durante dous días á semana tanto en Bertamiráns como en Milladoiro. Nestas clases traballáronse as distintas destrezas requiridas para a proba, utilizando un libro de texto e material de reforzo e práctica do exame, facendo fincapé na parte oral do mesmo.
O PET (Preliminary English Test) é un exame nivel intermedio que se corresponde co segundo nivel das probas oficiais da Universidade de Cambridge, que avalían os coñecementos de inglés xeral dende un nivel principiante ata avanzado. O certificado PET está recoñecido a nivel mundial tanto no sector académico como profesional e é equivalente ao nivel B1 do Marco Europeo Común de Referencia de Linguas Europeas. A obtención do mesmo significa que o alumno ou alumna é capaz de desenvolver as destrezas lingüísticas necesarias para afrontar situacións sociais e laborais correntes, nun entorno de fala inglesa.
O alumnado que participou nesta actividade quedou moi satisfeito co desenvolvemento do curso. Algúns destes alumnos/as presentaranse ás probas de Cambridge nos meses de xuño e xullo para acadar o título oficial PET. Os alumnos/as tamén lle trasladaron á concelleira o seu interese en continuar con este tipo de cursos formativos de cara ao vindeiro curso.