O Concello de Ames continúa coas actuacións para favorecer a mobilidade entre as diferentes zonas do concello. Desta volta, coa adecuación e instalación do alumeado público da senda peonil que une o CEIP Agro do Muíño co núcleo urbano de Bertamiráns e que disporá dunha senda ciclista paralela á senda peonil xa existente.

O acondicionamento da iluminación do sendeiro redunda na mellora da visibilidade o que vai permitir o acceso a pé e en bicicleta, así como facilitar un modo alternativo ao vehículo a motor particular e, tamén, dotar dunha maior conectividade aos núcleos do municipio.

A través desta actuación instaláronse trinta e unha luminarias LED na estrada que une a estrada da Condomiña con Agro do Muíño coas correspondentes columnas. Con esta instalacións cúmprese o regulamento de eficiencia enerxética en instalación de alumeado exterior e o regulamento electrotécnico de baixa tensión.

As obras de adecuación e instalación do alumeado público no sendeiro CEIP Agro do Muiño e Bertamiráns ascenden a 30.189 euros. Esta actuación está cofinanciada ao 80% co Fondo de Desenvolvemento Rexional (FEDER) e ao 20% polo Concello de Ames.

A presente actuación está cofinanciada pola Unión Europea a través do Fondo de Desenvolvemento Rexional (FEDER) cunha taxa de cofinanciamento do 80% dentro do Programa Operativo Plurirrexional de España 2014/2020, enmarcado dentro da Estratexia de Desenvolvemento Urbano Sostible Impulsa Ames, de conformidade coa Resolución do 21 de xullo de 2017, da Secretaria de Estado de Orzamentos e Gastos, pola que se resolve a concesión definitiva de axudas da segunda convocatoria para a selección de estratexias de desenvolvemento urbano sostible e integrado.

Concretamente, o contrato “Subministro do alumeado público no sendeiro CEIP Agro do Muíño e Bertamiráns” está incluído no Obxectivo Temático 4 de Cambio Climático, da  EDUSI Impulsa Ames, orientado a «Fomentar a transición cara a unha economía baixa en carbono en todos os sectores» e enmárcase na liña de actuación LA4, “Programa de creación dunha rede de sendeiros escolares, deportivos e recreativos que favorezan a conectividade a pé e en bicicleta”.

Carril Bici
Proximamente e para rematar esa actuación de mobilidade procederase á realización dun carril bicicleta que irá pegado á senda existente, e que servirá como comunicación ambiental entre Bertamiráns e o CEIP Agro do Muíño. Este carril bicicleta rematará no enlace de subida ao lugar das Cortes (Ortoño).

Novas relacionadas

El Correo Gallego: "Dotan con 31 luminarias a la senda a Agro do Muíño"

Compostela 24 Horas: "Rematadas as obras de instalación do alumeado público no sendeiro CEIP Agro do Muíño e Bertamiráns"

AMSGO!: "Acabadas as obras de iluminación da senda entre Bertamiráns e o Agro do Muíño"