O ioga terapéutico pechou unha serie de dous meses de actividades co programa “Activa Ames, Verán”, co que a Concellaría de Promoción da Saúde adoptou ao verán as súas propostas para o coidado de saúde física e emocional. As sesións de ioga terapéutico, taichi tradicional, chikung e marcha nórdica desenvolvéronse polas mañás e de xeito bisemanal tanto no Milladoiro como en Bertamiráns, cunha asistencia media de entre 15 e 16 persoas.

Desta forma, realizáronse por quincenas as actividades xa enumeradas. As sesións de ioga terapéutico abriron e pecharon o programa, do 4 ao 14 de xullo e do 16 ao 31 de agosto; as de taichi tradicional e chikung tiveron lugar do 18 ao 28 de xullo, mentres que as de marcha nórdica foron do 1 ao 11 de agosto.  No Milladoiro, o programa “Activa Ames, Verán” ocupou as mañás dos luns e os mércores, no entorno da piscina municipal, mentres que en Bertamiráns as sesións foron os martes e os xoves, nos xardíns do Pazo da Peregrina.

A concelleira de Benestar Social e Promoción da Saúde, Luisa Feijóo, quixo destacar “a excelente acollida” que tiveron as actividades en ambos núcleos urbanos. “Estamos encantadas coa boa resposta da veciñanza, é unha marabilla tanto para os monitores como para nós na Concellaría. Son actividades saudables, sempre orientadas a traballar corpo e mente, e a verdade é que tiveron unha acollida excelente. Mesmo tivemos varias persoas que viñeron dunha vila á outra para poder gozar máis días das actividades”.

Novas relacionadas:

El Correo Gallego: "Cuatro mil maianos utilizaron las piscinas y decenas probaron el yoga, taichí o chikung"

Enfoques: "El yoga, el taichi, el chikung y la marcha nórdica, protagonistas del verano en Ames"