O curso de informática da Escola de Maiores rematou o pasado mércores, 14 de xuño. Ao longo de catro meses, desde febreiro ata xuño, as 10 alumnas do curso aprenderon diferentes nocións sobre o uso da rede: como comprar por Internet, como acceder á lectura de xornais e revistas dixitais, como pedir unha cita no médico, emprego do buscador Google...

Organizado anualmente, o curso realízase ao longo de varios meses durante unha hora semanal. Este ano o día e horarios escollidos foron os mércores, de 16:30h a 17:30 horas. A entrega de diplomas produciuse o último día das aulas, que foi este mércores, 14 de xuño, coa presenza da concelleira de Voluntariado, Isabel González Cancela, do técnico da Oficina de Voluntariado de Ames (OVA), Rubén Ramos, e da responsable da aula de informática do Milladoiro, Almudena Caamaño.

Obradoiro de mecanografía para rapazas e rapaces
Por outra banda, na Aula de informática do Milladoiro continúan as actividades e cursos durante os meses de verán. Así, durante o mes de xullo vaise realizar un obradoiro de mecanografía para rapazas e rapaces, entre os 12 e os 18 anos. O obradoiro desenvolverase do 3 ao 12 de xullo, en horario de 11:00h a 12:00 horas, para o alumnado de entre 12 e 15 anos, e de 12:00h a 13:00 horas, para o comprendido entre os 16 e os 18 anos de idade. A duración do curso será de 7 horas en total.

Para inscribirse é preciso enviar cuberta e asinada a solicitude de inscrición, que se pode atopar na parte dereita desta nova, ao correo electrónico informatica.milladoiro@concellodeames.gal.

Horario de verán da Aula aberta
Por último, cómpre destacar que ata o próximo 15 de setembro, o servizo de Aula Aberta da Aula de informática do Milladoiro abrirá exclusivamente en horario de mañá, de 10:00h a 13:00 horas. Asemade, a Aula permanecerá pechada do 24 de xullo ao 24 de gosto (ambos incluídos), por vacacións do persoal que atende dito servizo.