En abril de 2025 botaron a andar as novas unidades VIDOC (Vehículos Integrais de Documentación) da Policía Nacional, que incorporan varias novidades con respecto ás anteriores unidades móbiles que percorrían os concellos galegos periodicamente.

Con este novo sistema a cidadanía pode renovar o DNI e, como principal novidade, tamén o pasaporte, xunto coa renovación dos certificados dixitais do DNI e a actualización das claves electrónicas. Ademais, deste xeito, redúcese o tempo de xestión para estes trámites e, así, as persoas que pidan cita neste servizo poden ter listos calquera dos documentos en cuestión de dez minutos. 

Nesta ocasión, a unidade móbil estará no Milladoiro o vindeiro martes 20 de xaneiro, en horario de 9:00 a 12:30 horas. Esta unidade VIDOC pode atender ata a 44 persoas diarias. Haberá dispoñibles dúas unidades de expedición, atendendo así 22 citas cada unha delas. Cómpre destacar que quedan 16 prazas das 44 citas dispoñibles para este día. As persoas interesadas en pedir cita no Concello de Ames, deberán enviar un correo ao enderezo electrónico: gabinete@concellodeames.gal, ou chamar ao número 881 074 730, indicando nome, apelidos e un teléfono de contacto.

Datas de atención ao longo de 2026
Ao longo de 2026 a unidade móbil de expedición do DNI e pasaporte estará en 9 ocasións máis no Milladoiro e Bertamiráns. No Milladoiro estará o 18 de marzo, o 13 de maio, o 16 de setembro e o 11 de novembro, mentres que en Bertamiráns fará o propio os días 18 de febreiro, 16 de abril, 16 de xuño, 13 de outubro e 3 de decembro. En ambas localidades haberá un descanso nos meses de xullo e agosto nos que non se prestará este servizo.

Deste xeito, o mércores 18 de febreiro a unidade VIDOC estará ao carón da Casa da Cultura de Bertamiráns, en horario de 9:00 a 12:30 horas. Neste caso quedan dispoñibles 8 prazas libres, que se poden ocupar enviando un correo ao enderezo electrónico: gabinete@concellodeames.gal, ou chamando ao número 881 074 730, indicando nome, apelidos e un teléfono de contacto. Na actualidade, pódese solicitar cita para a visita de dita unidade de xaneiro a xuño.

Axilización do proceso e máis servizos incorporados
Estas novas unidades de documentación traballan desde unha furgoneta equipada con dous postos de expedición, onde poden atender diariamente a 44 persoas e, ademais de realizar a renovación ou expedición do DNI como viña sendo habitual, a cidadanía pode facer o mesmo trámite co pasaporte e modificar ou actualizar as súas claves electrónicas, xa que tamén contan cun Punto de Actualización de Documentación (*PAC).

Ademais de aumentar o número de trámites que se poden realizar a través destas unidades móbiles, os tempos de xestión tamén se reducen considerablemente. Deste xeito, as persoas que pidan cita neste servizo poden ter listo calquera dos dous documentos en escasos dez minutos, mentres que coas anteriores unidades precisábanse tres días para a xestión completa (un día para realizar a pegada dactilar, outro para impresión nunha comisaría e un terceiro día para a posterior entrega).

É importante levar cartos en efectivo para o pago dos trámites, dado que os vehículos carecen de cobro por TPV. No caso de ser membros de familia numerosa débese achegar o documento pertinente que o acredite.