O primeiro destes encontros informativos terá lugar o luns, 18 de xuño, ás 18.00 horas na Casa da Cultura de Bertamiráns. A seguinte cita será o martes, 19 de xuño, na sala multiusos da Escola de Educación Infantil do Milladoiro tamén ás 18.00 horas. Nestas reunións, os pais e nais poderán coñecer a través dunha proxección-resumo todas as actividades realizadas polos seus fillos ao longo de todo o ano.

Na xornada de hoxe, remata o prazo de preinscrición no programa de Psicomotricidade Educativa e Preventiva que se vai desenvolver o próximo curso tanto en Bertamiráns como no Milladoiro. Debido á alta demanda de preinscricións rexistradas, o vindeiro martes, 19 de xuño, o salón de plenos do Concello de Ames acollerá ás dez da mañá un sorteo para cubrir as prazas ofertadas. A este sorteo poderán acudir todas as persoas interesadas. Os nenos e nenas que sexan admitidos terán que formalizar a matrícula do 21 ao 30 de xuño.

O Concello de Ames, a través da concellaría de Servizos, desenvolve o programa de psicomotricidade educativa e preventiva co obxectivo de favorecer no neno/a a expresión das súas vivencias, emocións e medos dun xeito espontáneo a través dunha dinámica de xogo e pracer. Este programa comezou a funcionar con menos de dez cativos, pero nestes momentos xa están matriculados arredor de 90 rapaces e rapazas de entre 3 e 5 anos.

O programa serve de apoio para o desenvolvemento persoal e a maduración do cativo. Ademais, tamén está orientado a que os nenos/as se acostumen a respectar os demais dentro dun grupo sen que teña que haber conflitos. As actividades de psicomotricidade educativa e preventiva realízanse nas instalacións dos colexios CEIP A Maía, CEIP Agro do Muíño e na Escola infantil do Milladoiro.