A programación primaveral con Apego do Concello de Ames diríxese a un público familiar, con especial incidencia nas familias con crianzas de 0 a 6 anos, e ten como un dos obxectivos transversais contribuír á socialización en galego da infancia. Acolle o desenvolvemento de diferentes actividades, cuxa organización corresponde aos diferentes departamentos municipais que traballan conxuntamente para a súa elaboración: Normalización Lingüística, Cultura, Educación e Medio Ambiente.

Marzo con Apego: foliada, contos, teatro e ciencia
A programación estréase este venres, 2 de marzo, coa celebración dunha Foliada con Apego, que terá lugar no Pazo da Peregrina de Bertamiráns a partir das 18:00 horas. Esta actividade busca construír unha espazo de socialización en galego onde poder compartir, cantar, bailar e aprender cancións galegas.

O programa infantil con Apego continúa no mes de marzo coas sesións de Contacontos na biblioteca, que se desenvolverán nas bibliotecas municipais do concello. Gato, Gato é o título das sesións de contos do mércores, 7 de marzo, en Bertamiráns, e do xoves 8 no Milladoiro. Nada é o que parece será o nome das sesións que terán lugar o mércores, 21 de marzo, no Milladoiro e o xoves 22 en Bertamiráns e nas que se poderán descubrir contos cheos de sorpresas. Dirixidas a crianzas entre os 3 e os 8 anos, todas as sesións de contos na biblioteca comezan ás 17:00 horas. As familias interesadas poderán achegarse estes días ás bibliotecas para gozar, aprender e ir tecendo o seu universo literario.

Este mes tamén acollerá a representación da obra teatral Pum, pum!, de Baobab Teatro S.L, que terá lugar o venres 9, ás 18:00 horas, na Casa da Cultura do Milladoiro para un público familiar con crianzas a partir de 5 anos. Pun, pum! é un espectáculo de monicreques, teatro de actor, máscaras e sombras, con música orixinal interpretada en directo. As entradas poderanse adquirir na Billeteira electrónica do Concello de Ames.

Os obradoiros de marzo achegarán aos máis cativos á ciencia a través da actividade Peque Ciencia Divertida, unha serie de obradoiros manipulativos nos que as nenas e os nenos participantes se introducirán na ciencia dun xeito divertido a través de experimentos, xogos, vídeos... A actividade, que estará dirixida a crianzas entre os 3 e os 6 anos e que precisa inscrición previa, desenvolverase os xoves 10 e 17 de marzo, das 12:00h ás 13:00 horas, no Pazo da Peregrina.

Cantacontos para bebés, de Pablo Díaz, é a proposta que trae este mes para a xente máis miúda da casa, para familias con nenas e nenos de 0 a 3 anos de idade. Será o venres 16 na Casa da Cultura de Bertamiráns, con dúas sesións, a primeira ás 18.00 h e a segunda ás 19.00 h. Nela Pablo Díaz fará unha viaxe a través dos contos coa música como fío condutor, tratando temas e rutinas adaptadas ás primeiras idades. Para conseguilo, axudarase de instrumentos como a frauta, a guitarra e a harmónica e dalgún dos seus temas máis populares.

Abril con Apego: contos, teatro, arrolos, poesía e natureza
O mes de abril comezará novamente con duplas sesións de contos, tanto na biblioteca do Milladoiro como na de Bertamiráns. A primeira delas, centrada en historias de crocodilos, titúlase Croco-croco e será o mércores 4 en Bertamirás e o xoves 5 no Milladoiro. As sesións do mércores 18 no Milladoiro e do xoves 19 en Bertamiráns denomínanse Todos/as cantar! e nelas cantaranse contos.

A compañía Malasombra producións traerá en abril a obra Os fabulosos cleaners á Casa da Cultura de Bertamiráns. A peza está protagonizada por dous operarios da limpeza dun teatro que descobren, por casualidade, as posibilidades das súas ferramentas de traballo combinadas con auga e xabón. A obra representarase o venres, 6 de abril, ás 18:00 horas. As entradas poderanse adquirir na Billeteira electrónica do Concello de Ames.

Para os sábados 7 e 21 de abril está programado un paseo sensitivo polo bosque de Agrón, encadrado no programa Con-tacto Natural. O obxectivo desta iniciativa é achegar ás cativas e cativos á natureza a través dos olores, das texturas, das cores e dos sons naturais. Dirixida a crianzas entre os 2 e os 7 anos, a actividade contará con servizo de autobús e precisa inscrición previa. As saídas serán ás 10:30h da Casa da Cultura do Milladoiro e ás 10:45 h da Praza do Concello de Bertamiráns.

As familias que estean agardando un bebé ou que teñan cativos de 0 a 3 anos teñen unha cita con Xavier Díaz e Guillerme Fernández para aprender cantos de berce e comezar así a transmitir a lingua e a música desde o berce. Arrolos de Salitre, de Xabier Díaz e Guillerme Fernández, desenvolverase o xoves 12 de abril no Pazo da Peregrina de Bertamiráns. Haberá dúas sesións: unha ás 18:00 h e outra ás 19:00 h. O prazo de inscrición desta actividade estará aberto do 3 ao 11 de abril.

O espectáculo-recital poético, A poesía é un globo, terá lugar o venres 13 de abril, ás 18:00 horas, na Casa da Cultura do Milladoiro e está destinado a familias con nenas e nenos entre os 3 e os 6 anos. A actividade correrá a cargo de Fran Alonso e buscará espertar o interese pola poesía e o ritmo a través de diferentes recursos como a oralidade, a lectura e a música, combinados con varaidas propostas visuais. O prazo de inscrición abrirá o 3 de abril e pechará o día 12 dese mes.

O venres 27 terá lugar na Casa da Cultura do Milladoiro a representación da obra teatral O secuestro da bibliotecaria. A peza, unha produción de Sarabela Teatro, aborda a historia do secuestro da empregada da biblioteca da vila de Parangón, dun consello municipal que non sabe que facer e dunha banda de secuestradores con varicela. A obra, dirixida a un público entre os 5 e os 12 anos, comezará ás 18:00 horas. As entradas estarán previamente dispoñibles na Billeteira electrónica.

Maio con Apego: contos, música e teatro
A programación do Apego para o mes das letras comezará e rematará tamén con contos nas bibliotecas municipais do concello. O mércores 2 en Bertamiráns e o xoves 3 no Milladoiro desenvolveranse as sesións Inventando contos. O martes 15 en Bertamiráns e o xoves 16 no Milladoiro serán os días de Tic.. tac.. tic... tac... . Finalmente, as últimas sesións de maio traerannos historias de roupa, Contos no tendal, e terán lugar o mércores 30 en Bertamiráns e o xoves 31 no Milladoiro.

O venres, 4 de maio, é o día da contada musical As aventuras de Mamá Cabra. Será ás 18:00 horas, na Casa da Cultura de Bertamiráns. Ese día, Gloria Mosquera, creadora das cancións de Mamá Cabra, acompañada por Iago Rodríguez ás teclas e á percusión, levaranos de viaxe pola música deste coñecido grupo. Dirixida a nenas e nenos de entre 1 e 4 anos, a inscrición para asistir a esta actividade deberase realizar entre o 24 de abril e o 3 de maio.

A programación con Apego do Concello de Ames para a primavera rematará co espectáculo sensorial participativo Minia convídate a xogar, de Babaluva Teatro. Será para familias con crianzas de 1 a 6 anos e desenvolverase o venres, 25 de maio, na Casa da Cultura do Milladoiro, con dúas sesións: unha ás 18:00h e outra ás 19:00 horas. Este espectáculo resalta a importancia do xogo creativo e intenta fomentar nas crianzas e nas familias a creatividade e a comunicación cos obxectos que nos rodean. O prazo de inscrición permanecerá aberto entre o 15 e o 24 de maio. En cada unha das actividades que recolle este programa aparece o departamento que organiza, co obxectivo de que as persoas interesadas en obter máis información poidan dirixirse a el a través dos contactos que aparecen no propio folleto.

Información e inscrición das familias no programa Apego
As familias que estean agardando un bebé ou que teñan crianzas de 0 a 6 anos poden dirixirse ao Servizo de Normalización Lingüística municipal para inscribirse e recibir información de actividades e recursos que faciliten a socialización en galego da infancia. Ademais, se o neno ou nena ten menos dun ano, recibirán unha caixiña de benvida con recursos útiles para a crianza. Pode solicitarse unha cita a través do teléfono 662 377 215. Para ampliar información sobre o programa pode consultarse a páxina web www.apego.gal

Contido relacionado

El Correo Gallego: "La primavera se anticipa ya en Ames con Apego y Teatro"