Durante os meses de xaneiro, febreiro e marzo o Centro de Información da Muller de Ames e a Asociación de Nais e Pais de Alumnos IES de Ames, en colaboración coa Concellaría de Servizos Sociais e Igualdade, levaron a cabo un programa de obradoiros de empoderamento feminista e novas masculinidades no IES de Bertamiráns. A finalidade desta iniciativa foi a de guiar aos rapaces e rapazas na toma de conciencia dos roles sexistas que xoga cada persoa, comprender de onde veñen socialmente, e comezar a tomar conciencia de cando, como, e para que os utilizamos na nosa vida.

Ao abeiro deste programa, realizaronse unha serie de obradoiros de corporalidade e emocións destinados ás estudantes, que contaron coa participación dunhas trece rapazas de entre 14 e 16 anos. Durante as sesións, a educadora emocional e terapeuta corporal Belén Bernardo traballou coas mozas o empoderamento feminista a través de ferramentas dirixidas á prevención, ao autocoidado e á autoxestión no ámbito da súa corporalidade. Así, as mozas aprenderon a utilizar a expresión corporal como forma de exteriorizar as emocións e canalizar a súa forza.

Así, as oito sesións que conformaron esta actividade estiveron dirixidas a fomentar a autonomía das participantes, axudarlles a asimilar todas as temáticas dende a vivencia corporal e adquirir conciencia emocional, así como unha maior comprensión de si mesmas. Ademais, a través de diversos exercicios, buscouse establecer vínculos emocionais positivos entre as integrantes do grupo e mellorar a súa capacidade para xestionar o estrés e relaxar o corpo. Os obradoiros realizáronse todos os xoves comprendidos entre o 24 de xaneiro e o 14 de marzo, en horario de 17.00 a 19.00h.

A educación, investimento fundamental

Se ben mediante os obradoiros de empoderamento feminista e novas masculinidades pretendeuse que as adolescentes tivesen de referencia o seu corpo como unha área básica e vital, co obxectivo de incorporar unha identidade persoal á hora de relacionarse, tendo como referencia a corporalidade, a sensibilidade e a autoxestión, no tocante ás sesións dirixidas aos mozos, explorouse o que significa ser home na sociedade global de hoxe en día, como está relacionada co noso modo de vida e o que implica. Así, traballouse a apertura dos rapaces cara o bo trato consigo mesmos, como base dende a que impulsar ese trato en positivo co resto, desterrando as violencias machistas. Para rematar, realizouse unha sesión conxunta destinada a que os mozos e mozas traballasen a convivencia positiva, as relacións de bo trato e o respecto.

Ligazóns:

Compostela 24 horas: "Rapaces do IES de Ames participaron nos obradoiros de corporalidade e emocións de empoderamento feminista"