A Milla Urbana Concello de Ames volve o domingo 25 de setembro, na que será a súa décimo sexta edición. Deste xeito, a Concellaría de Deportes recupera un evento deportivo que levaba sen celebrarse dende o ano 2015, en conxunto coa Federación Galega de Atletismo.

A proba, na que se inscribiron un total de 391 persoas entre nenos/as e adultos, contará cun circuíto urbano de entre 200 metros e unha milla, dependendo do ano de nacemento das persoas participantes. Na categorías de pitufos/as (de 0 a 4 anos) inscribíronse 38 cativos/as que terán que percorrer 200 metros. Na categoría de prebenxamíns (nados e nadas no 2015, 2016 e 2017) participarán 58 nenos e nenas que farán 300 metros.

Os sub10, sub12, sub14 e sub16, nados entre o 2007 e o 2014, terán que correrá un quilómetro. Na categoría sub10 participarán 52 rapaces e rapazas, na categoría sub12 hai 55 inscritos, na categoría sub14 hai 30 participantes e na categoría sub16 son 34 inscritos). Por último, nas categorías sub18, sub20, sub23 e sénior inscribíronse 36 persoas, mentres que na categoría máster hai 88 inscritos. Os/as participantes nestas categoría terán que correr unha milla, o equivalente a 1,61 quilómetros aproximadamente.

Horarios, premios e regulamento
As carreiras comezarán entre as 11:00 e as 12:45 horas na travesía do Porto, no Milladoiro. Antes, a partir das 9:00 horas habilitarase un punto no aparcadoiro da área deportiva do Milladoiro para a retirada de dorsais, que se poderá realizar ata media hora antes das probas.

As persoas participantes deberán colocarse na saída cinco minutos antes do comezo da proba. Durante a carreira, deberán portar o dorsal-chip, que os seguirá ao longo do percorrido, baixo o control do comité de xuíces da Federación Galega de Atletismo.

Recibirán trofeos os/as tres primeiros/as clasificados/as de cada categoría, masculinos e femininos. A entrega de trofeos farase ao rematar a carreira na área deportiva do Milladoiro, na travesía do Porto. Non haberá premios nin trofeos para os/as participantes das categorías prebenxamín e pitufo, nas que se entregará un agasallo a cada participante.

Alteracións de tráfico pola XVI Milla Urbana
Debido á realización desta proba deportiva haberá cortes de tráfico e prohibicións de estacionamento nos arredores da área deportiva do Milladoiro. Deste xeito, estará prohibido estacionar o domingo, 25 de setembro, no aparcadoiro da área deportiva e da Casa da Cultura do Milladoiro das 8:00 ás 14:00 horas.

Ademais, as seguintes rúas, por onde transcorre a citada Milla Urbana, estarán cortadas ao tráfico en horario das 10:00 ás 13:00 horas: Travesía do Porto, rúa dos Agriños, parte da rúa Pardiñeiros e parte da avenida Muíño Vello. Polo que, se recomenda evitar as vías mencionadas para evitar retencións de tráfico.