Conservas de froitas, verduras e peixe, pasta e arroz, legumes, leite, galletas e alimentos infantís. As familias adheridas ao programa municipal de alimentos reciben tres veces ao ano produtos de alimentación non perecedoiros. A semana pasada realizouse o segundo gran reparto do ano con fondos que proviñan do FEAD. Ao redor de 160 familias no Milladoiro e 130 en Bertamiráns recibiron a axuda nesta ocasión.

Cada familia recibe un lote de alimentos en función do número de persoas que forman a unidade familiar, así como das súas necesidades específicas, dependendo se hai lactantes, menores ou adultos con problemas de alimentación.

“Dada a difícil situación que estamos a atravesar, co peche de moitos negocios e o incremento do paro, as solicitudes para recibir axuda deste Banco Municipal de Alimentos van medrando como o demostra o incremento das reparticións e das cantidades”, manifesta a concelleira de Benestar Social, Luísa Feijóo, quen engade que “con este programa intentamos axudar na medida do posible a paliar as dificultades que teñen algunhas familias do noso concello para o acceso a unha alimentación adecuada; cos alimentos que se reparten sempre intentamos garantir almorzo, comida e ceas equilibrados. A estas grandes reparticións hai que sumar os repartos puntuais que se fan tódalas semanas, así como o reparto de froitas e verduras quincenais e as cestas saudables semanais”.

O Programa Municipal de Alimentos está xestionado pola Concellaría de Benestar Social. Fanse tres grandes repartos de alimentos ao ano. Os alimentos proceden principalmente de tres programas: o Fondo de axuda europea para as persoas más desfavorecidas en España, o fondo galego de garantía agraria e do banco de alimentos Rías Altas (Balrial).

Poden solicitar esta axuda as familias empadroadas no concello de Ames que carezan de medios económicos e precisen dela para satisfacer a necesidade básica de alimentación. Deben cumprir os requisitos establecidos na Ordenanza municipal reguladora da prestación de alimentos do Concello de Ames.

O programa artéllase a través dos técnicos do servizo, as educadoras familiares e os membros da brigada municipal de obras que se encargan de facer a descarga de alimentos e o traslado de ditos alimentos a UTS do Milladoiro e ao almacén de Bertamiráns. Adoitan ademais a colaborar no reparto os voluntarios e voluntarias da OVA.

Novas relacionadas:

El Correo Gallego: "Ames cubre con víveres carencias de 300 familias"

Revista AmesGo: "Reparto de alimentos non perecedoiros para 300 familias sen recursos"

Compostela 24horas: "Preto de 300 familias amesás son beneficiarias do Programa Municipal de Alimentos"