O alcalde en funcións, Santiago Amor, valora “extraordinariamente” esta actividade de “convivencia familiar” entre cativos e pais arredor dos contos infantís, así como o club de lectura formado por adultos. “As nosas bibliotecas teñen un uso case completo de recursos e instalacións, con 6.600 socios, polo que este rendemento óptimo nos indica que debemos seguir coidando este tipo de actividades que conxugan formación, cultura e lecer”.  

A temática destas sesións para nenos centrouse nos elementos que se poden atopar no ceo: as nubes, as estrelas, a lúa... con títulos como “O arco da vella”, “Y la luna sonrió” ou “Garoto busca unha estrela”. Tamén houbo sesións especiais da man da escritora e narradora ferrolá Charo Pita, que achegou aos máis pequenos o seu último libro titulado “Nenos e nenas”.  

Para o mes de xuño hai programadas novas xornadas de animación á lectura que se celebrarán dende o luns día 1 ao xoves día 4, ás 18:00 horas, nos locais sociais de Augapesada e Bugallido e nas bibliotecas do Milladoiro e de Bertamiráns, respectivamente. Ademais, os sábados 6 e 13, ás 11:00 horas, haberá dous obradoiros para nenos de entre 6 e 12 anos impartidos pola compañía Vagalume, dentro da campaña "Ler conta moito" que promove a Xunta de Galicia. Serán nas bibliotecas do Milladoiro e de Bertamiráns.  

Dez anos de club de lectura  
As bibliotecas municipais de Ames tamén poñen en marcha o club de lectura, un punto de encontro arredor dos libros que se celebra cada quince días e ao que acoden preto dunha vintena de persoas. Esta actividade cumpre dez anos de vida e segundo o seu coordinador, Santiago Eirís, faino “con moita vitalidade” acollendo veciños de distintos perfís e idades.

Contido relacionado

La Voz de Galicia: "Casi 2.800 niños fueron en Ames a las sesiones de cuentacuentos"
El Correo Gallego: "Os contacontos nas bibliotecas de Ames atraeron neste curso a 2.800 rapaces"