Nesta iniciativa, as zocas e zocos son nenas e nenos, dos 0 aos 14 anos, cuxas familias están a pasar por un momento de dificultades económicas. O obxectivo da campaña é que ningún neno e nena quede sen agasallos este Nadal. De aí a existencia dos trasnos, persoas voluntarias que mercarán un presente para algunha destas nenas e nenos. Na pasada edición, foron 196 as crianzas que se beneficiaron deste programa. As cifras deste ano son moi similares ás do ano pasado xa que hai 193 zocos.

Así, a través desta campaña repartiranse, coa axuda dos Reis Magos, agasallos a 193 nenos e nenas de familias amesás que atravesan dificultades económicas. A campaña, que foi posta en marcha o pasado mes de outubro pola Oficina de Voluntariado de Ames e a asociación veciñal “Vivo en Ames”, conseguiu recrutar a 200 trasnos para que ningún neno ou nena se quede sen o seu agasallo nunha noite tan especial como a de Reis. Os sete zocos sobrantes quedan de reserva por se estes días chega algunha carta máis.

A concelleira de Promoción Económica e Voluntariado, Isabel González, expresou a súa enorme satisfacción pola campaña desenvolvida que tivo un éxito rotundo e fixo fincapé en que “son os nosos nenos/as os beneficiarios desta iniciativa e un ano máis terán o seu agasallo de Reis. Quero agradecer a todos os trasnos/as por facer posible un ano máis este programa, así como aos colectivos e os e as traballadores e traballadoras da empresa Tecalis que sumaron esforzos para darlle un pulo á campaña, e unha vez máis, os nosos voluntarios e voluntarias polo seu traballo arreo todo o ano”.

A principal novidade da campaña Zocos e Trasnos reside na atención personalizada que cada neno ou nena vai ter logo de escribir a súa carta aos Reis Magos. Os trasnos encárganse de facer chegar aos Reis os agasallos que recibirán os zocos, eses nenos e nenas de 0 a 14 anos cuxas familias están a pasar dificultades económicas. A organización foi a encargada de recoller as cartas de Reis dos zocos e facelas chegar aos trasnos.

Xoguetes sen carácter sexista nin bélico
Os trasnos/as foron os encargados de envolvelo e entregalo nalgún dos puntos de recollida situados por Ames. Para escoller un regalo tivéronse en conta tres requisitos: non deberían ter carácter sexista nin bélico, e ter un custo que rondase os 30 euros. Os agasallos doados polos trasnos clasificáronse e estanse entregando ás familias para que estas os coloquen nos seus fogares na mañá de Reis.

Nesta campaña colaboraron diversos colectivos e empresas de Ames. Deste xeito, os integrantes de Arcea-Adames elaboraron os carteis dos recunchos trasno, lugares indicados para depositar os xoguetes. Tamén se implicaron varias empresas, participando coma trasnos como é o caso dos traballadores de Tecalis, unha compañía que está situada no polígono do Milladoiro. Outra entidade que se sumou a esta iniciativa foi a empresa ServiOcio, que xestiona as instalacións municipais do Centro deportivo municipal A Telleira.