Ir ao hospital, ao banco, á piscina ou á farmacia convértense en actividades imposibles para persoas que presentan dificultades serias na mobilidade. Estas persoas con mobilidade reducida válense do servizo de transporte adaptado do Concello de Ames para realizar actividades da vida cotiá nun horario interrompido de 8:00 horas da mañá ás 19:30 horas da tarde. Ademais, este servizo vese reforzado co programa de acompañamento a persoas maiores e/ou con discapacidade. Os voluntarios/as préstanlle axuda a todas aquelas persoas que presentan problemas graves de mobilidade e non contan con apoio familiar para realizar actividades da vida cotiá.

No que levamos de ano 2012 (xaneiro e febreiro) o servizo de transporte adaptado experimentou un gran incremento no número de servizos realizados, xa que preto de 100 persoas servíronse do transporte adaptado municipal. Os usuarios que empregaron este servizo foron persoas con diferentes graos de dependencia. Estas persoas empregaron o servizo para achegarse a Santiago de Compostela (ao hospital, á delegación de Facenda, á Seguridade Social, á cita de rehabilitación ou ao Instituto Galego de Vivenda e Solo) ou para facer pequenos desprazamentos polo propio concello (ao centro médico, á Casa do Concello, ás oficinas de Servizos sociais, a farmacia ou ao banco).

Nove prazas para persoas sentadas e dúas cadeiras de rodas forman un total de once prazas que compoñen o microbús do servizo de transporte adaptado municipal. O vehículo complétase coa condutora e a auxiliar de transporte que axuda a todas as persoas usuarias a subir e baixar do microbús. O grado de dependencia de moitos dos veciños e veciñas que demandan este servizo está provocado por doenzas como a esclerose múltiple, trastornos psicolóxicos, dificultades de mobilidade ou emprego de cadeira de rodas e idade avanzada.

Estas persoas, que teñen as mesmas necesidades que o resto da veciñanza, ven limitadas as súas posibilidades para desprazarse dun lugar a outro. Este servizo é unha oportunidade para que as persoas con mobilidade reducida poidan desenvolver con normalidade a súa vida cotiá.

Para solicitar máis información ou facer a súa reserva de praza, a concellaría de Servizos Sociais, Familia, Dependencia e Maiores conta cun teléfono gratuíto, o 900 204 000, e para unha atención personalizada os interesados e interesadas poden achegarse á Oficina de Voluntariado de Ames (OVA) na Casa da Cultura de Bertamiráns. O horario para facer a consulta, sexa de forma presencial ou por teléfono, é de 9:00 h. a 15:00 horas da mañá.