O Concello de Ames, a través da Concellaría de Deportes e Promoción da Saúde, organiza a actividade “Camiñando no solpor”, unha serie de dúas andainas que se realizarán os xoves 6 e 20 de agosto no Milladoiro e Bertamiráns. Ambas camiñadas comezarán ás 20.00 horas e terán unha duración aproximada de dúas horas. A primeira desta serie de andainas terá lugar mañá, día 6, no Milladoiro O punto de encontro en ambas localidades é o centro de saúde.  

A concelleira de Deportes e Promoción da Saúde, Susana Señorís, sinalou que “as actividades deportivas achegan beneficios físicos e mentais, sendo a tempada estival unha época especialmente boa para facer deporte”. A edil remarcou que “con “Camiñando no solpor” dámoslle continuidade as andainas saudables que propoñemos ao longo do resto do ano e que tamén ten como punto de encontro os centros de saúde”. 

“Camiñando no solpor” é unha das propostas de actividades deportivas e terapéuticas de verán que organiza o departamento de Deportes para este verán. Ao longo dos meses de xullo e agosto, impartíronse diferentes actividades, todas gratuítas e sen necesidade de inscrición previa: ioga, ioga terapéutico, taichi-chikung e aquagym.  

Polas mañás do mes de xullo impartíronse as actividades de taichi-chikung, do 1 ao 15 de xullo; o ioga terapéutico, que se desenvolveu entre o 17 e o 31 de xullo; e a actividade de ioga realizouse durante os mércores e venres do mes de xullo na piscina descuberta de Bertamiráns, e no Milladoiro os martes e xoves nos xardíns na piscina descuberta da localidade. Por outro lado, nas tardes do mes de xullo impartíronse as sesións de aquagym.