O departamento de Bibliotecas municipais de Ames retomou as sesións do programa “Encontros Literarios”, unha das súas propostas con mellor acollida. Desta volta, Óscar M. Guzmán, estará a presentar “Pero... como morren as pegas?”, novela gañadora do premio literario Vilar Ponte 2023 do Concello de Viveiro. 

Sobre ‘Pero... como morren as pegas?’
Óscar M. Guzmán (Vilamarín, Ourense, 1970) é un escritor que publicou no 2021 a súa primeira novela, “Os segredos de Teresa”, unha obra na que inaugurou a saga do inspector Saladino Mariño. No pasado 2023 publicou a súa segunda novela,  “Pero... como morren as pegas?” coa que gañou o V Premio Literario Vilar Ponte do Concello de Viveiro e na que dá continuidade á narrativa do seu primeiro libro. 

Nesta segunda parte da saga, Saladino Mariño, inspector xefe da Policía Nacional, intentará resolver un novo caso. Nesta ocasión, a do asasinato dun magnate ourensán do transporte. Unha historia chea de intriga na que, a través da procura da verdade deste caso, levaranos a percorrer boa parte da provincia de Ourense e parte de Portugal. 

Sesións programadas para novembro e decembro
Para este mes de novembro está programa unha segunda sesión dos Encontros Literarios o vindeiro día 20, no que Marta Estévez presentará “La tercera orilla”.

Para decembro xa está programada unha sesión dos Encontros Literarios o vindeiro xoves día 4, no que Amada Traba, Priscila Retamozo e Chis Oliveira presentarán “Las trampas de la pornografía. La sexualidad que deseamos”, da editorial Los libros de la Catarata.

Novas relacionadas: 

La Voz de Galicia: "Presentación de libros de Óscar M. Guzmán y Atutxa Ordeñana"

Diario de Santiago: "Óscar M. Guzmán presenta este xoves o seu libro “Pero… como morren as pegas?” nunha nova sesión dos Encontros Literarios, en Ames"