As usuarias e usuarios da Rede municipal de comedores escolares cambiaron as súas preferencias este ano para despedir o curso. Por primeira vez o alumnado elixiu a hamburguesa con patacas fritas, para o menú de fin de curso que se serviu hoxe, penúltimo día de clase, xa que o mércores unha gran parte do alumnado xa come nas súas casas.

Este foi o décimo sétimo ano no que se celebraron estas peculiares eleccións nos comedores escolares. Nesta ocasión, o alumnado tivo que escoller entre seis posibilidades: albóndegas con arroz e salsa de tomate, croquetas caseiras, churrasco con patacas fritas, hamburguesa con patacas fritas, peituga rebozada (nugets) con pasta tricolor e salmón con arroz.

Este ano decidiuse incluír como opción a hamburguesa no lugar da pizza de xamón e queixo. O cambio tivo éxito porque finalmente a hamburguesa foi a opción máis votada despois de seis anos consecutivos gañando o churrasco.

Dende o 2011 o churrasco con patacas fritas gañou en nove ocasións e a pizza de xamón e queixo dúas veces. En 2011, 2012 e 2013 gañou o churrasco, mentres que en 2014 e 2015 impúxose a pizza. Os seis últimos anos volveu a gañar o churrasco como o prato favorito dos nenos e nenas da Rede municipal de comedores escolares ata este ano que se impuxo a hamburguesa.

Por outra banda, a listaxe de opcións de sobremesa contiña cinco opcións que eran o iogur de chocolate, xeado artesán, xeado polo, flan con nata e amorodos con nata. Para a sobremesa elixiron polo de limón ou laranxa.

A nutricionista elixe un prato
O Concello fai valer a súa representatividade para elixir outro prato que completa o menú de fin de curso, de maneira que dúas comidas son decisión dos cativos e outra vén definida pola dirección da Rede municipal de comedores escolares. Deste xeito, o primeiro prato que se serviu foi puré de cenoria.

Outro obxectivo que se busca con estas eleccións é que o alumnado aprenda os valores dunha educación en democracia e a respectar o que elixe a maioría. Ademais esta actividade serve para que o Concello coñeza os gustos e preferencias dos máis cativos a hora de xantar.

Novas relacionadas:

Enfoques: "Los comedores escolares de Ames disfrutan lo votado: fin de curso con hamburguesa"