Os nenos e nenas tiveron que escoller un prato e unha sobremesa. No caso do prato había seis posibilidades: churrasco con patacas fritas, pizza de xamón e queixo, peituga rebozada (nugets) con arroz e salsa de tomate, albóndegas con arroz e salsa de tomate, espaguetes á boloñesa con queixo e pescada rebozada con pasta tricolor. A listaxe de opcións de sobremesa contiña cinco opcións que eran o polo de xeado, xeado de corte de tres sabores, amorodos con nata, iogur de chocolate e flan con nata.

A nutricionista elixe un prato
O Concello fai valer a súa representatividade para elixir outro prato que complete o menú, de maneira que dúas comidas son decisión dos cativos e outra vén definida pola dirección da Rede municipal de comedores escolares. Deste xeito, o primeiro prato que se servirá será un puré de cenoria. Aínda que o curso remata o día 21 de xuño este menú servirase o día 20 porque o último día a gran maioría do alumnado xa come na súa casa.

Outro obxectivo que se busca con estas eleccións é que o alumnado aprenda os valores dunha educación en democracia e a respectar o que elixe a maioría. Ademais esta actividade serve para que o Concello coñeza os gustos e preferencias dos máis cativos a hora de xantar. Para realizar estas curiosas eleccións empregáronse as urnas que se empregan nos comicios municipais, autonómicos e estatais.

Xa se coñece o resultado das eleccións que se celebraron a pasada semana, co obxectivo de elixir os pratos que conformarán o menú do día 20 de xuño da Rede Municipal de Comedores Escolares. Este é a décimo terceira vez que se celebran eleccións nos comedores escolares para escoller os pratos cos que se quere despedir o ano académico. As eleccións desenvolvéronse durante o horario no que se emprega o servizo de comedores no CEIP Agro do Muíño, CEIP A Maía, CEP de Ventín, CEIP de Barouta e na EEI do Milladoiro. Co cento por cento dos votos escrutados, o churrasco con patacas fritas e o xeado de xeo (polo de limón ou laranxa) proclamáronse como os gañadores. Votaron 1.026 nenos e nenas.

O reconto total de votos quedou do seguinte xeito: churrasco con patacas fritas, 329 votos; pizza de xamón e queixo, 280 votos; albóndegas con arroz e salsa de tomate, 215 votos; peituga rebozada (nugets) con arroz e salsa de tomate, 105 votos; espaguetes á boloñesa con queixo, 82 votos; e pescada rebozada con pasta tricolor, 14 votos. Na sobremesa, o polo de xeado impúxose con 526 votos ao xeado de corte de tres sabores, que obtivo 235 votos. Os amorodos con nata acadaron 117 votos; o iogur de chocolate 106 votos, e o flan con nata, 40.

Dende o 2011 o churrasco con patacas fritas gañou en seis ocasións e a pizza de xamón e queixo dúas veces. En 2011, 2012 e 2013 gañou o churrasco, mentres que en 2014 e 2015 impúxose a pizza. Os tres últimos anos volveu a gañar o churrasco como o prato favorito dos nenos e nenas da Rede municipal de comedores escolares. Este ano o churrasco con patacas frita gaño nos comedores dos CEIP Agro do Muíño, Barouta e a Maía, mentres que a pizza de xamón e quixo impúxose nos comedores do CEP de Ventín e da EEI do Milladoiro. O xeado de xeo (polo de limón ou laranxa) gañou en todos os comedores, excepto no da EEI do Milladoiro, no que gañou o xeado de corte de tres sabores.