A chuvia, que provocou que durante toda a xornada os excursionistas tiveran que carrexar co paraugas, non impediu aos 5 usuarios/as do SAF e os seus acompañantes gozar da visita a Pontevedra que o servizo organizou nos primeiros días do mes de outubro.

Os viaxeiros chegaron á cidade do Lérez ás dez da mañá. As Ruinas de Santo Domingo e o Monumento aos Héroes da Batalla da Ponte Sampaio foron os primeiros lugares  que visitaron. Despois adentráronse no casco histórico e camiñaron polas súas rúas até chegar á Basílica menor de Santa María a Maior.

Na Praza de Méndez Núñez contemplaron a estatua do escritor Valle Inclán. Ás 11:30 fixeron unha pequena parada para tomar un café na praza de Ferrerías. Logo dese pequeno descanso, os excursionistas visitaron a Capela da Peregrina. O percorrido rematou na praza Peregrina, ao lado da estatua do Loro Ravachol e ás 12:30 volveron á Igrexa de San Roque, onde os agardaba o autobús .

Visita guiada
A guía Raquel Abollo, do Departamento de Turismo do Concello de Pontevedra,  acompañou aos excursionistas durante toda a xornada e explicoulles a historia e as peculiaridades dos lugares que visitaron, facendo especial fincapé nos nomes das rúas e na denominación antiga e actual de cada unha delas.

A concelleira Luísa Feijóo explicou que “estas saídas organízanse “como unha mellora do servizo que estamos a prestar desde o SAF e sempre co obxectivo de fomentar a sociabilidade das persoas maiores, para que poidan coñecer as contornas culturais das diferentes zonas de Galicia e para favorecer os recordos presentes na memoria dos noso maiores e dependentes”. Feijóo quixo tamén agradecer ao Departamento de Turismo do Concello de Pontevedra a visita guiada que lles ofreceu aos e ás excursionistas.