O Concello de Ames, a través da Concellaría de Educación e Cultura, ofreceu durante os meses de xullo e agosto o servizo de bibliopiscinas nas piscinas municipais descubertas de Bertamiráns e do Milladoiro e na praia fluvial de Tapia. Cada unha delas contou cunha monitora ou monitor especializado, a excepción dos fin de semana, que houbo dúas persoas encargadas da bibliopiscina de Tapia. Cada unha das bibliopiscinas dispuxo de libros, xogos tradicionais e de mesa para os máis pequenos e pequenas da casa, así como con xornais e libros para un público máis adulto.

Ademais, o servizo de bibliopiscinas incluíu tanto actividades de animación á lectura, como lúdicas. Deste xeito, houbo sesións de contacontos, xogos e diferentes obradoiros, que na maioría dos casos se realizaron con materiais de refugallo. Os nenos e nenas fixeron flores con caixas de ovos e papeis de cores; e elaboraron dinosauros, lapiseiros e instrumentos musicais con rolos de papel. Tamén participaron en obradoiros de papiroloxía con xornais e papeis; construíron xogos de corcho; elaboraron cadros e caretas con cartóns; decoraron pedras para utilizalos como pisapapeis e pintaron murais con elementos da natureza, etc.

Espazo itinerante sobre igualdade
Nesta edición das bibliopiscinas houbo unha novidade respecto a outro anos. Creouse un espazo sobre igualdade que estivo de maneira itinerante polas tres bibliopiscinas. Estivo composto por sete obras, pensadas para idades diferentes e cuxa temática tentaba abordar a igualdade de xénero. O obxectivo principal foi ensinarlles os nenos e nenas, dunha forma sinxela e entretida, valores necesarios para acadar a igualdade entre homes e mulleres.

Superheroe. Manual de instrucións estivo dirixido aos nenos e nenas que tiñan de 3 anos en diante. A través deste libro buscouse fomentar valores como a empatía, a tolerancia, a xustiza e o respecto. A obra Sopa de cabaza foi para os rapaces e rapazas de ata 7 anos e estivo orientado á resolución de conflitos. Para os nenos e nenas de máis de 7 anos escolléronse os libros Eu vou comigo; Orellas de bolboreta; e Billy e o vestido rosa. A obra Croquetas e wasaps foi para rapaces e rapazas de máis de 12 anos. Este libro que versa sobre educación emocional e crecemento persoal, compartiu a súa temática coa obra Non son perfecta, pensada, neste caso, para rapazas e rapaces de máis de 14 anos.

Horario das bibliopiscinas
En Bertamiráns e no Milladoiro o horario foi de luns a venres de 16:00 h a 20:00 horas. As fins de semana e os festivos estiveron pechadas. En Tapia o horario foi o mesmo, dende as 16:00 h ás 20:00 horas, pero de martes a domingo (os luns estiveron pechadas por descanso do persoal). Ademais, estivo aberto os días festivos. Este servizo foi impartido por varios monitores/as que se encargaron de facer máis entretidas as tardes de piscina da época estival.

Contido relacionado

El Correo Gallego: "Cultura, ocio e igualdad de género desde las tres bibliopiscinas de Ames"