Os alumnos de educación infantil e de primaria fan uso das vías públicas como peóns ou como viaxeiros. Por ese motivo dende o programa municipal de Bos días Cole impartiuse unha actividade, que está incluída dentro do programa educativo deste servizo, sobre a educación viaria. A través desta iniciativa pretendeuse concienciar aos nenos e nenas da importancia de adoptar unhas actitudes viarias positivas, encamiñadas á creación do sentido viario, a convivencia e as pautas axeitadas para unha mobilidade segura.

Deste xeito, os 286 alumnos/as que acoden a servizo municipal do Bos días Cole, que se imparte no CEIP A Maía, o CEIP Agro do Muíño, no CEIP de Barouta, no CEP de Ventín e na EEI Milladoiro, participaron nun programa de Educación Viaria. Esta actividade rematou cunha charla dos axentes da Policía Local de Ames sobre as normas de circulación e de seguridade que hai que adoptar á hora de circular pola rúa. Os rapaces e rapazas participaron en varios obradoiros e xogos de elaboración de sinais de tráfico. Este programa estivo dirixido ao alumnado de 2º ciclo de Educación Infantil e Primaria.

Os axentes da Policía Local de Ames tamén lle explicaron aos rapaces e rapazas por onde teñen que cruzar unha estrada e impartiron unha serie de recomendacións de seguridade como ir da man dos seus pais/nais cando circulan pola rúa e cando cruzan por un paso de peóns. Tamén se lle deron unhas pautas de seguridade para saber o que teñen que facer cando quedan sós nas súas casas como é non abrirlle a porta a persoas estrañas ou cando navegan pola Internet. Por último, explicóuselle aos rapaces e rapazas que deben axudar aos seus pais e nais cando fan mal as cousas: conducir falando polo móbil, non cruzar polos pasos de peóns, etc.

A Policía Local de Ames participa habitualmente en cursos e programas de educación viaria cos centros educativos amienses. A través deste programa preténdese que o alumnado adquira diversos coñecementos para saber como camiñar pola beirarrúa; coñecer como se cruza polos pasos de peóns e nas vías que non hai pasos de peóns; como subir e baixar dos vehículos; como viaxar adecuadamente en autobús; e usar o casco sempre que circulen en bicicleta.

Os pais e nais son os primeiros instrutores do neno/a
Por outra banda, tamén é moi importante a aprendizaxe que lles imparten os pais e nais, xa que son o primeiro instrutor do neno/a na súa aprendizaxe sobre seguridade viaria e no modelo que vai a adoptar no seu futuro comportamento. Os nenos irán adquirindo os coñecementos básicos, ao tempo que se lles pon en alerta dos posibles perigos cando se fan as cousas mal e das vantaxes cando se fan correctamente.

Diversos estudos indican que a mellor idade para iniciar aos nenos/as na educación viaria é entre os 3 e os 5 anos, debendo continuala durante os ciclos de educación primaria e secundaria con novas ensinanzas en función da súa idade e da súa interrelación co mundo que os rodea: funcionar só como peón, no seu novo papel de ciclista, como condutor dun ciclomotor, etc. Neste sentido, o ideal é manter unha combinación entre as mensaxes verbais, de iconas e de comportamento para conseguir unha educación viaria efectiva.