O IX Seminario de amigos da viticultura organizado pola Oficina de Voluntariado de Ames por noveno ano consecutivo mantén o éxito de edicións anteriores. Este ano, como novidade, os participantes crearon un blog ao que soben a información coa que traballan nas clases. Os participantes no seminario aseguran que lles é moi útil e que o consultan a miúdo.

Neste curso estanse abordando cuestións referidas ao mantemento dos cultivos e a saúde dos viñedos e achegando información relacionada coas diversas castes propias de Galicia, cos marcos de plantación máis axeitados para a produción e maduración do viño, coas distintas formas de guiar os bacelos e coas melloras técnicas de poda que se deben aplicar.

Este obradoiro goza dunha gran acollida e a el acoden persoas de moi diverso perfil. Hai xente que vai porque ten viñedos e quere perfeccionar as técnicas de obtención e tratamento do viño; outra acode ao seminario pensando principalmente en adquirir coñecementos de cata.

O curso de viticultura supón unha maneira formidable de mellorar as súas explotacións vinícolas profesionais e, tamén, domésticas. Así, os cultivos poderán perfeccionarse e ter unha maior categoría grazas á información sobre os métodos para combater as pragas e os consellos sobre as boas prácticas para unha correcta realización na poda.

O novo blog amigosviticulturaames.blogspot.com é moi útil para os asistentes ao seminario, pero está aberto ás visitas de todo aquel que se interese polo tema da viticultura.