A Casa da Cultura de Bertamiráns acolleu, esta mañá, o acto de entrega de diplomas aos 19 alumnos e alumnas do obradoiro dual de emprego ForestAmes-Brión. Ao acto asistiron o alcalde de Ames, Blas García; o alcalde de Brión, Pablo Lago; o Delegado Territorial da Xunta de Galicia Gonzalo Trenor e a concelleira de Promoción Económica, Ana Paz.

Remata deste xeito un obradoiro que comezou en decembro de 2020 e onde ao longo de 1496 horas de formación os alumnos acadaron o Certificado de profesionalidade “Repoboacións forestais e tratamentos silvícolas”.  

Estes obradoiros permiten formar a persoas en ocupacións de futuro e realizar traballos de interese social e ambiental na comunidade “investíronse máis de 13.300 horas de traballo en campo para limpar faixas auxiliares de pista e defender núcleos rurais contra incendios. Acabamos de rematar a limpeza de preto de nove quilómetros de pistas e a plantación con frondosas autóctonas en 12 hectáreas” explicaba o director do obradoiro, Andrés Novo. Novo quixo, ademais, felicitar aos alumnos e ás alumnas polo traballo realizado e en especial a aqueles que van comezar a traballar a vindeira semana.

Este obradoiro está sufragado pola Consellería de Emprego e Igualdade, da Xunta de Galicia, e con achegas municipais dos Concellos de Ames e Brión.

O alcalde de Brión, Pablo Lago, destacou a importancia que estes obradoiros teñen tanto para os alumnos como para os concellos en que se imparten “os alumnos saen deste obradoiro cun diploma que os cualifica profesionalmente pero estes obradoiros tamén son moi importantes para o Concello de Brión pois serven para demostrarlle aos veciños e veciñas a importancia de limpar o monte, sobre todo, preto das vivendas”.

O Delegado Territorial da Xunta de Galicia, Gonzalo Trenor, destacou os obradoiros de emprego como a ferramenta fundamental da Xunta para mellorar a empregabilidade “estes obradoiros serven para mellorar a formación básica esencial dos alumnos pero, sobre todo, para conseguir o obxectivo da Xunta de mellorar a inserción laboral pois estes obradoiros acadan preto do 100% da empregabilidade unha vez finalizados”. Trenor sinalou o beneficio que este tipo de accións teñen tanto para o alumnado como para os concellos “os alumnos destes obradoiros acadan unha certificación que ten validez en todo o territorio nacional, algo clave para que poidan atopar un posto de traballo. Ademais, os concellos vense beneficiados ao impartir obradoiros que se axustan ás demandas laborais da comarca e dos concellos”.O Delegado Territorial quixo rematar a súa intervención felicitando aos concellos de Ames e Brión por todo o traballo realizado ao longo destes meses para sacar adiante esta oferta normativa e tamén pola concesión dun novo obradoiro dual de emprego de “Montaxe e mantemento de instalacións solares fotovoltaicas”.

Pola súa banda, o alcalde de Ames, Blas García, quixo agradecer a participación do Delegado Territorial da Xunta de Galicia neste acto de entrega dos diplomas pero, tamén, á conselleira de Emprego e Igualdade por apostar polo emprego e por estes obradoiros no Concello de Ames. E destacou “este traballo é froito da colaboración entre os Concellos de Ames e Brión pero tamén coa administración autonómica. Esta colaboración ten que ir un paso por diante e impartir cursos adaptados ás necesidades dos veciños e das veciñas e ao mesmo das empresas como poden ser nas áreas da construción, do sector servizos, das TIC`s ou das enerxías renovables”.
García rematou poñendo en valor o traballo de aposta polo emprego que se realizou no Concello de Ames nos últimos anos “dende o ano 2005 preto de dúas mil persoas pasaron polos distintos cursos de formación, acadando unha alta taxa de inserción laboral”.

Obradoiro dual de emprego
É un programa de formación e emprego en que os traballadores/as desempregados/as recibiron cualificación profesional ao mesmo tempo que desenvolveron un traballo produtivo de actividades de utilidade pública. Durante 9 meses os traballadores/as realizaron traballos de xestión dos montes en ambos os dous concellos.
Os alumnos traballadores recibiron, ademais, formación teórico práctica sobre repoboación, silvicultura, manexo de tractores e aplicación de produtos fitosanitarios e empregan maquinaria e equipos como como motodesbrozadoras, biotrituradora, tractores forestais con distintos apeiros e equipos de aplicación de fitosanitarios.

Obradoiro de enerxías renovables
O Concello de Ames e Brión van impartir un novo obradoiro dual de emprego. Esta mesma semana publicáronse as bases para a selección do alumnado traballador e persoal do obradoiro de emprego Renova IV.

Neste obradoiro 20 alumnos van recibir formación específica de “Montaxe e mantemento de instalacións solares fotovoltaicas” durante 9 meses.

Novas relacionadas

El Correo Gallego: "A Maía tendrá un taller de instalaciones solares"

Revista AmesGO: "Remata o Obradoiro ForestAmes-Brión"