Como vén sendo habitual nos últimos anos a Rede Municipal de Comedores Escolares tamén celebra a festa de Entroido ofrecéndolle ao alumnado que é usuario deste servizo unha sobremesa típica desta época do ano. Así, os máis de 1.000 nenos e nenas que fan uso deste servizo municipal puideron degustar as saborosas orellas de Entroido. Este servizo, que está dirixido ao alumnado de infantil e primaria, ofrécese nos centros de ensino do CEIP Agro do Muíño, CEIP A Maía, EEI Milladoiro, CEP de Ventín e CEIP de Barouta.

Isto foi posible grazas ao gran traballo que realizaron os cociñeiros e cociñeiras da Rede Municipal de Comedores Escolares. As orellas que se ofrecen son caseiras e están feitas de xeito tradicional. Primeiro prepárase a masa e a continuación estírase e pasan pola fritidora. Para poder realizar esta sobremesa hai que centralizar a elaboración do menú nunha cociña e noutra cociña elabóranse as orellas. Deste xeito, na cociña da EEI do Milladoiro encargáronse de facer a comida e no CEIP Agro do Muíño fixeron as orellas de Entroido. Para os alumnos/as con tratamentos alimentarios especiais preparáronse unhas filloas especiais.

O concelleiro de Educación e Servizos, Bernardo Moar, explicou que “todos os nenos e nenas que son usuarios/as da Rede Municipal de Comedores Escolares van a degustar unha saborosa sobremesa típica de Entroido. Isto require dun gran esforzo por parte de todos os traballadores dos comedores municipais, pero faise con moito agarimo por parte de todos os cociñeiros e cociñeiras”.