A Oficina de Voluntariado de Ames (OVA) organizou para este luns, 22 de abril, unha charla informativa sobre a recollida e a contaminación dos produtos fitosanitarios. Esta actividade está aberta a toda a veciñanza amiense, aínda que se enmarca dentro do curso de viticultura que se imparte todos os luns na aula de usos múltiples da Casa da Cultura do Milladoiro.

A charla será impartida por unha técnica da empresa Sitgfito Agroenvases S.L. Nesta actividade impartiranse diferentes nocións para que os/as participantes coñezan o sistema de recollida de envases fitosanitarios que realiza esta compañía co obxectivo de darlles un tratamento ambiental correcto. Este sistema ten unha dobre finalidade: por unha banda, facilita a unha serie de colectivos (envasadores, distribuidores, agricultores) o cumprimento das obrigacións en materia de residuos de envases fitosanitarios, evitando posibles sancións. Por outra banda, axuda a preservar o medio ambiente e favorece o desenvolvemento sustentable da agricultura.

Cómpre destacar que o produto fitosanitario é unha sustancia ou mestura de sustancias destinadas a previr a acción dos insectos (insecticidas), ácaros (acaricidas), moluscos (molusquicidas), roedores (raticidas), fungos (fungicidas), malas herbas (herbicidas), bacterias (antibióticos e bactericidas) e outras formas de vida animal ou vexetal prexudiciais para a saúde pública e tamén para a agricultura.

Para obter máis información sobre esta actividade poden chamar ao número de teléfono 662 377 044. Se o prefiren, poden pasar pola Oficina de Voluntariado de Ames (OVA), situada na Casa da Cultura de Bertamiráns, en horario de 10:00 h a 14:00 horas. Tamén poden enviar un correo electrónico ao enderezo voluntariado@concellodeames.org