A Concellaría de Promoción da Saúde dálle continuidade ao programa municipal de Andainas Saudables cunha nova actividade para o sábado 4 de febreiro. Nesta ocasión trátase dunha ruta de once quilómetros pola vila de Porto do Son, cunha dificultade moderada. Arrinca na praia das Furnas e recorre diversos puntos do concello, tanto a carón do mar como pola zona de interior. Deste xeito, percórrese a área da praia Río de Sieira e da praia de Xuño, e pásase por lugares emblemáticos, como o promontorio no que se atopaba o Castelo de Burleu, a igrexa de Santa Mariña ou a ponte medieval de Xuño.

Para esta actividade dispoñerase dun servizo de autobús, que sairá ás 9:15 horas dende a Casa da Cultura do Milladoiro e ás 9:30 horas da praza do Concello de Bertamiráns. Hai dispoñibles 70 prazas, de maneira que as persoas interesadas en percorrer a ruta deben apuntarse cubrindo o formulario que pode atoparse premendo nesta ligazón ou escaneando o código QR do cartaz anexo. O prazo para anotarse remata o xoves 2 de febreiro, ás 14:00 horas. Recoméndase que os participantes leven roupa e calzado cómodo.

Programa Andainas saudables
As andainas saudables organízanse unha vez ao mes, sempre durante as fins de semana. Ao longo do pasado ano realizáronse numerosas saídas que tiveron como obxectivo complementar as actividades levadas a cabo co programa SaúdeAndo e completando recorridos de maior dificultade.

Durante os últimos meses as persoas que se inscribiron puideron realizar rutas pola Vía Verde entre Cerceda e Oroso, polos muíños de Riamontes, pola Illa de Arousa ou entre Noia e Portosín.