[29-12-2012] O Concello de Ames está repartindo varias caixas de alimentos entre as familias amienses sen recursos. Esta iniciativa está promovida pola concellaría de Servizos Sociais, por medio do Departamento de Educación Familiar, e pola concellaría de Voluntariado, a través da OVA. Os alimentos foron doados pola empresa Feiraco e por varias entidades privadas de Ames. No reparto dos alimentos colaboran o persoal do Servizo de Atención ao Migrante e da Oficina de Voluntariado de Ames. Este acto altruísta permitiralles ás familias que carecen de recursos pasar un mellor Nadal.
O acto altruísta e solidario de varias empresas privadas que colaboran co Concello de Ames permitiralles ás familias amienses con menos recursos pasar unhas mellores festas de Nadal. A empresa Feiraco puxo en marcha unha iniciativa entre os seus traballadores co obxectivo de recadar cartos e comprar alimentos para as familias con menos recursos. Cada traballador de Feiraco que quixo participar voluntariamente na iniciativa doou 10 euros do seu soldo para este fin. O importe recadado foi dobrado polo propia empresa. Feiraco comprometeuse a achegar a mesma cantidade de diñeiro que se recadara a través de todas as achegas do persoal. Con todo este diñeiro compráronse alimentos e doáronse 20 caixas a cada un dos cinco concellos que forman o padroado.
Os técnico do Servizo de Atención ao Migrante e da Oficina de Voluntariado ao igual que a Educadora Familiar foron os encargados de ir buscar as caixas a sede da empresa Feiraco. Cada caixa está composta por 19 produtos entre os que se atopan alimentos como aceite, leite, legumes, cacao, atún, salchichas, arroz, pasta, etc. Estas caixas repartiranse entre as familias máis necesitadas de Ames.
Ademais, houbo dúas empresas privadas de Ames que desenvolveron iniciativas similares. A propietaria do centro de estética Verónica Asorey realizou unha recollida de alimentos e doouna ao Concello de Ames para que fose a Oficina de Voluntariado a encargada de repartilos entre as familias con menos recursos.
Por outra banda, un comercio hostaleiro de Bertamiráns doou dez vales canxeables por comida para que as familias con menos recursos puideran dispor de cea en Noiteboa. Estes vales repartíronse entre cinco familias de Bertamiráns e cinco familias do Milladoiro. Estas persoas só tiveron que acudir ao restaurante e trocar o vale por comida para a cea de Noiteboa.
