Foron moitos os e as amienses que se achegaron ata a praza do Concello este sábado pola a tarde para asistir á presentación do libro de Dolores Vilavedra e para poder participar na feira de exposición e venda de libros. A celebración comezou ás 17:00 horas coa feira literaria onde se podían mercar todo tipo de libros, tanto de literatura infantil como novela e poesía. Dende a Concellería de Cultura estiman que ao longo de toda a tarde pasaron polas carpas que se instalaron na praza do Concello arredor de 500 persoas.

O obxectivo desta feira foi sacar os libros dos espazos pechados e levalos á rúa para que todas aquelas persoas que non soen acudir habitualmente ás bibliotecas ou centros de lectura se animasen a descubrir os diferentes mundos que se esconden detrás de cada exemplar. Ademais, a venda contou cun 10% de desconto sobre o prezo habitual nas librarías.

Simultaneamente, desenvolvéronse dous obradoiros para elaborar o gran libro do día do libro e para facer marcapáxinas. Os rapaces e rapazas puideron aprender distintas técnicas para confeccionar os seus propios marcapáxinas. Ademais entre todos os rapaces e rapazas fixeron un libro de grandes dimensións. Así mesmo houbo un posto dedicado á creación de camisetas literarias con Tinta de Lura. Cada persoa que participou neste obradoiro puido decorar a súa propia camiseta. Esta actividade centrou boa parta da atención dos máis pequenos durante toda a tarde.

Presentación literaria
O primeiro acto da tarde tivo lugar ás 17:00 horas coa presentación e sinatura do libro, A narrativa galega na fin de século, por parte da propia autora, Dolores Vilavedra. Nesta presentación tamén participaron Calos Lema, director de edicións da Editorial Galaxia, a escritora Inma López Silva e o concelleiro de Cultura, Deportes e Patrimonio Histórico, Francisco Villaverde.

O acto abriuno o concelleiro de Cultura dando as grazas tanto a Dolores Vilavedra como a Imma López Silva e Carlos Lema por acudir a este evento organizado polo Concello de Ames. Todos destacaron a importancia do libro de Dolores Vilavedra como unha ferramenta fundamental para entender a literatura de fin de século e primeiros anos do novo milenio. Ao mesmo tempo agradecéronlle ao Concello de Ames non só polo acto do sábado senón por apoiar a literatura de base co Certame Literario que leva organizando dende o ano 2004.

Dolores Vilavedra destacou que "o libro abrangue dende 1985 ata o ano 2000 teoricamente, aínda que hai unha serie de tendencias que se albiscaban a finais do pasado século que tamén están incluídas neste traballo. Agora, o tempo decidirá se se confirman ou non. Algún destes temas é a literatura feminina que irrompe de xeito innovador a finais do pasado século".

A escritora explicou que "o libro está centrado na narrativa e non se comenta nada sobre a poesía que é outro xénero que ten as súas técnicas propias. Eu diría que está é a etapa na que a narrativa entra na madurez definitiva. O primeiro que eu fago é demostrar que a década dos oitenta non é a década da gran expansión cuantitativa da narrativa senón que é a dos noventa cando o número de títulos se dispara absolutamente".

Acto literario musical e obradoiros
A conmemoración do Día do Libro pechouse cun acto literario - musical. Ás 18:00 horas a música e a literatura mesturáronse na presentación do libro recompilatorio das obras gañadoras do VII Certame literario Concello de Ames. A concellaría de Educación tamén participou neste evento a través da Biblioteca coa realización de obradoiros e de diversos contacontos que tamén se realizaron a partir das 17:00 horas.

Os gañadores da modalidade de poesía puideron ler o seu poema ao completo, mentres que na modalidade de narrativa escolléronse os mellores fragmentos para ler ante o público. A lectura de fragmentos dos textos premiados por parte dos seus autores e autoras intercaláronse coa actuación musical do dúo amiense Pel de Noz.

A maioría dos autores premidos na pasada edición deste certame asistiron a este acto lierario-musical para ler o seu traballo. Francisco Villaverde, concelleiro de Cultura, Olaia Alvite, concelleira do grupo municipal nacionalista, Alfonso Rey, concelleiro do grupo municipal popular, e Xosé Montes da Fundación Feiraco, tamén participaron na lectura dos traballos gañadores VII Certame Literario Concello de Ames. Así rematou unha xornada que tivo as letras como protagonistas.