[11-02-2016] Os auditorios das Casas da Cultura de Bertamiráns e do Milladoiro prepáranse para acoller, entre os meses de febreiro e de xuño, a nove compañías diferentes que traen, baixo o brazo, comedias, traxedias e espectáculos pensados para toda a familia. As entradas para a obra do venres 19 de febreiro xa se poden adquirir na Billeteira electrónica, a cal se pode acceder premendo nos banners que están dispoñibles na páxina web municipal www.concellodeames.gal
Abre a programación a obra "Presidente" este venres, 19 de febreiro. As entradas para esta obra que a compañía Teatro do Morcego vai representar na Casa da Cultura de Bertamiráns xa están á venda na Billeteira electrónica. "Presidente", dirixida por José Prieto, conta no seu elenco con Celso Parada, Mercedes Castro, César Goldi, Iolanda Muíños e Federico Pérez. A obra, unha sátira da manipulación política, narra a historia do máximo mandatario dun Estado que, ante o medo de perder as vindeiras eleccións, decide visitar a varias familias, moi distintas entre si, para convencelas de que é o mellor candidato.
O mes de marzo ofrece dúas obras aos amantes máis pequenos do teatro. A compañía Baobab presenta "Luppo" o día 4, ás 18:30 horas, na Casa da Cultura do Milladoiro. Esta obra foi gañadora en 2015 do premio ao mellor espectáculo infantil da Feira de Teatro Ciudad de Rodrigo. Pola súa banda, desta volta na Casa da Cultura de Bertamiráns, os membros de A Gramola Gominola ofrecen o venres 11 de marzo o seu espectáculo homónimo, no que mesturan baile e música para facer gozar ao público infantil.
En abril representaranse tres pezas diferentes. De entre elas "O principio de Arquímedes" será a primeira. Traído a Ames da man de Teatro do Atlántico a representación poderase acudir o día 1 de abril tanto na Casa da Cultura de Bertamiráns, ás 11:00 horas, como na do Milladoiro, ás 21:00 horas. O venres 8 de abril o grupo Talía Teatro narrará a historia da elefanta Margarita nos dous pases do seu espectáculo infantil "Rosa Caramelo e outras historias", o primeiro deles ás 12:30 e o outro ás 18:30 horas, ambos na Casa da Cultura de Milladoiro. "Palabras malditas", da agrupación Teatro do Noroeste, é a obra que pecha, o día 29, ás 21:00 horas, a programación de abril no auditorio da Casa da Cultura de Milladoiro.
En maio, a obra "Falar sen cancelas", unha mestura de comedia, improvisación e clown, representarase na Casa da Cultura de Bertamiráns, ás 21:00 horas. Neste mesmo espazo, pero o día 27 de maio, a cantante Uxía e o Magín Blanco, alianza en expertos en divertir e animar o público infantil, subiranse ao escenario para interpretar o espectáculo "Canta o cuco" en dous pases distintos: un ás 12:30 e outro ás 18:30 horas.
Para poñer peche a medio ano de teatro a obra didáctica "Shakespeare para ignorantes", creada por Quico Cadaval, represéntase o día 3 de xuño, ás 21:00 horas, na Casa da Cultura de Bertamiráns.
Contido relacionado
El Correo Gallego:"Teatro para todos con 9 compañías nas dúas urbes"