“Animais de Compañía” é unha comedia musical con dúas personaxes: unha cadela e unha gata, que conviven na mesma casa e que malia teren as súas diferenzas aprenden a respectarse. Desta maneira, ao igual que nas fábulas clásicas, os dous animais adoptan características humanas para construír un proceso de aprendizaxe e toma de valores éticos, a través do cal se establece un paralelismo entre o que acontece entre elas e o que sucede na sociedade actual.

A obra, que foi escrita por Eduardo Alonso, conta coas intérpretes Manuela Varela e Inma António. A peza será representada o vindeiro venres, 26 de xaneiro, ás 18:00 horas, na Casa da Cultura do Milladoiro. A peza está destinada a un público infantil maior de seis anos.

As entradas xa están dispoñibles na Billeteira electrónica. Así mesmo, tamén se poden adquirir, anticipadamente, nas Casas da Cultura do Milladoiro e Bertamiráns, de luns a venres, en horario de 10:00h a 13:00 horas. O 10% das entradas resérvanse para vender, de xeito presencial, desde unha hora antes do comezo do espectáculo. Cada entrada ten un prezo de cinco euros, cun desconto do 50% para persoas maiores de 65 anos, menores de 12 e estudantes con carné.

Contido relacionado

Lindeiros: "Animais de Compañía inaugura este venres a programación de teatro infantil de Ames"