Os campos municipais de fútbol do Milladoiro e Bertamiráns foron os espazos escollidos para o desenvolvemento do I Torneo de Nadal de Fútbol Concello de Ames, que estivo organizado polo propio concello en colaboración co Bertamiráns FC. Este mércores, 3 de xaneiro, tiveron lugar as competicións das categorías infantil, no Milladoiro, e alevín e benxamín, en Bertamiráns. Na categoría infantil participaron seis equipos. O primeiro partido celebrouse ás 16:00 horas, mentres que o último tivo lugar ás 20:15 horas. A entrega de trofeos realizouse ás 21:00 horas. Nesta categoría resultou gañador o equipo Atlético Riveira, mentres que o equipo C do Bertamiráns FC acadou o subcampionato.

En Bertamiráns, a entrega de premios celebrouse ás 20:00 horas, despois dunha tarde na que se celebraron os partidos das categorías alevín e benxamín. Un total de seis equipos participaron en cada unha destas categorías. O equipo C do Bertamiráns FC e o ED Xuventude Oroso acadaron, respectivamente, o primeiro e o segundo posto da clasificación na categoría alevín. Na categoría benxamín, o equipo gañador foi o Victoria CF, mentres que o equipo C do Bertamiráns FC quedou en segunda posición. Os equipos gañadores recibiron un trofeo colectivo. Todas as nenas e nenos participantes recibiron, igualmente, un obsequio por parte do Concello de Ames.

Categoría pre-benxamín
A tarde de hoxe, 4 de xaneiro, estará reservada para os partidos disputados polos oito equipos que conforman a categoría pre-benxamín. Entre as 16:00h e as 19:45 horas, estes equipos competirán pola primeira e a segunda posición. A entrega de premios celebrarase ás 19:50 horas. Como nas outras categorías, e co obxectivo de primar a participación por riba da competición, ningún equipo será eliminado despois do primeiro partido, senón que as eliminacións se realizarán en función da puntuación adquirida. Cada partido gañado implicará a obtención de tres puntos e por cada empate sumaranse dous puntos.