[10-03-2011] O Centro de Depósito de Residuos do Punto Limpo, situado no polígono do Milladoiro, continúa rexistrando uns magníficos datos que amosan a concienciación da cidadanía amesá co medio. A veciñanza segue empregando este centro de depósito para desfacerse daqueles obxectos e materiais que non van aos colectores convencionais de materiais orgánicos, inorgánicos, vidro ou papel. As cifras rexistradas durante o mes de febreiro, cun total de 314 entradas, amosan a tendencia do Punto Limpo que segue rexistrando un maior número de entradas mes a mes. Durante este mes destaca o incremento nos equipos electrónicos, envases baleiros contaminados e aceite vexetal que se achegaron ao Punto Limpo. No que levamos de ano o Punto limpo xa rexistrou máis de 700 entradas.
O Punto limpo comeza este ano como rematou o 2010. Durante o mes de xaneiro rexistrou 401 entradas e no pasado mes de febreiro producíronse 314 entradas máis. En dous meses xa se rexistraron un total de 715 entradas. Estes datos amosan a tendencia deste depósito de superar ano a ano a media de entradas recibidas. O número de entradas rexistradas nos meses de xaneiro e febreiro supoñen unha mostra do respecto e da preocupación dos amienses polo medio e sitúan a media do ano 2011 en máis de 350 entradas, superior claramente á media de 320, que se rexistrou no ano 2009, e moito máis ampla se temos en conta a media de 2008, que foi de 250 entradas. Respecto á media do ano pasado, que foi de 369 entradas, é lixeiramente inferior debido a que só levamos dous meses contabilizados do presente exercicio.
Durante o mes de febreiro, os e as amienses entregaron no Punto Limpo 1.500 quilos de equipos electrónicos, 100 quilogramos de unidades de envases baleiros contaminados, 49 unidades de tubos fluorescentes e outros tipos de lámpadas, 20 pneumáticos fóra de uso, 8 baterías de chumbo e 6 quilos de pilas. A veciñanza deixou tamén 43 quilos de pintura, 6 aerosois, 6 metros cúbicos de papel, 1 metros cúbicos de roupa, 10 metros cúbicos de plásticos, 20 de metais e outros 20 de voluminosos como colchóns, sofás e escumas. Os entullos procedentes de obras menores supuxeron 90 metros cúbicos e os restos de madeira chegaron aos 15 metros cúbicos. Por último, achegáronse 262 litros de aceites vexetais e 53 de motor. Durante este mes destaca o incremento nos equipos electrónicos, envases baleiros contaminados e aceite vexetal que se achegaron ao Punto Limpo.
O Punto Limpo está situado na rúa das Hedras do polígono Novo Milladoiro e ata alí poden achegarse todos os veciños e veciñas de Ames para desfacerse de aqueles obxectos e materias que non van aos colectores convencionais de materiais orgánicos, inorgánicos, vidro ou papel. O centro está aberto preto de 40 horas semanais en xornada de mañá e tarde entre luns e o sábado. Así, o Punto Limpo abre de luns a venres de 10:00 h. a 14:00 h. e de 16:00 h. a 18:00 horas. Os sábados o horario é de 9:00 h. a 14:00 h. e de 16:00 h. a 20:00 horas.
Ao mesmo tempo, a Concellaría de Servizos Básicos mantén un servizo de recollida gratuíta de mobles e trastes que se fai todos os venres. So é preciso chamar ao 981 191 240 indicando o tipo de residuo que quere tirar e deixalo xunto ao colector de lixo máis próximo á súa vivenda.