Os veciños e veciñas de Ames cada vez son máis conscientes da importancia que ten facer un uso correcto dos residuos que non van os colectores convencionais. Iso demóstrase no incremento de visitas que está experimentando o Punto Limpo. Cada vez son máis as persoas que achegan a este centro para depositar alí todo tipo de residuos, favorecendo a súa mellor valorización e evitando o seu depósito incontrolado. Así non pasado mes de xullo alcanzáronse as 628 visitas, unha das mellores entradas por mes dende que comezou a funcionar este servizo a comezos de 2017.

A cifra de entradas deste mes de xullo é moi similar a dos meses de xullo e agosto do ano pasado, cando se rexistraron 612 e 615 visitas respectivamente. O teito no número de entradas está nas 650 entradas rexistradas no mes de setembro de 2017. En relación aos residuos achegados pola veciñanza amesá no pasado mes de xullo destaca notablemente o incremento no aporte de aceite vexetal, achegándose 130 litros, e de pneumáticos fóra de uso con 430 quilos (54 unidades).

Deste xeito durante o mes de xullo os veciños e veciñas de Ames entregaron 3.244 quilos de equipos electrónicos, 120 quilogramos de envases baleiros contaminados e 430 quilos (54 unidades) de pneumáticos que se atopaban fóra de uso. Tamén se entregaron 76 unidades de tubos fluorescentes e outras lámpadas, 220 quilos (14 unidades) de baterías de chumbo, 15 quilogramos (430 unidades) de pilas e 14 unidades de aerosois.

Os entullos procedentes de obras menores supuxeron 30 metros cúbicos, aos que se sumaron 20 metros cúbicos de plásticos, 30 de metais e outros 80 de madeira, así como 104 quilogramos de pintura. Os veciños e veciñas tamén achegaron 130 litros de aceites vexetais e outros 46 de aceite de motor. O Punto Limpo tamén recolleu 3 metros cúbicos de roupa, 9 de papel e outros 80 de voluminosos como colchóns, sofás e escumas.

Cada cousa no seu sitio!
Para concienciar á veciñanza de que vivir nun Ames limpo depende de cada un de nós, púxose en marcha a campaña “Cada cousa no seu sitio!”. A través do folleto informativo deseñado para esta campaña, lémbraselle aos veciños e veciñas que os RAEE (residuos de aparatos eléctricos e electrónicos) deben depositarse no Punto Limpo. Tamén se indica que os voluminosos (mobles e enseres) pódense levar ao Punto Limpo ou chamar ao número de teléfono 981 19 12 40, para que os recollan no propio domicilio da persoa que se quere desfacer deles.

Por outra banda, no folleto de dita campaña recórdase que a materia orgánica debe ir ao contedor verde;  a materia inerte ao contedor amarelo; e os CD/DVD, cartuchos de impresora, teléfonos móbiles e baterías aos mini puntos limpos que están repartidos polo termo municipal. O vidro ten que ir ao contedor iglú verde e o papel ao contedor azul.

Horarios e teléfono de contacto
O Punto Limpo está situado na rúa das Hedras do polígono Novo Milladoiro e ata alí poden achegarse todos os veciños e veciñas de Ames para desfacerse de aqueles obxectos e materiais que non van aos colectores convencionais de materiais orgánicos, inorgánicos, vidro ou papel.

O centro está aberto preto de 40 horas semanais en xornada de mañá e tarde entre luns e o sábado. Así, o Punto Limpo abre de luns a venres de 10:00 h a 14:00 horas e de 16:00 h a 18:00 horas. Os sábados o horario é de 9:00 h a 14:00 horas e de 16:00 h a 20:00 horas. As persoas que teñan calquera dúbida poden chamar ao teléfono 981 53 66 88. Para a recollida de voluminosos e enseres a domicilio, a cidadanía que chamar ao número de teléfono 981 19 12 40.

O parque de reciclaxe ou Punto Limpo é un centro de aporte voluntario, equipado de colectores específicos, capacitado para recibir residuos dos particulares censados en Ames que deberán acudir ao centro co DNI ou volante de empadroamento. O servizo é de balde para estes/as veciños/as. O Punto Limpo favorece a separación en orixe, contribuíndo á reciclaxe dos residuos e participando na loita contra os vertidos incontrolados.

Ligazóns:

El Correo Gallego: "Crece el uso en Ames del punto limpio"

Compostela 24 horas: "O Punto Limpo de Ames rexistra 628 entradas durante o mes de xullo"