Como xa é costume no concello, o alumnado da EMMA celebrará o próximo 21 de xuño o seu concerto de fin de curso. Este ano, a actuación presenta novidades con respecto a anos anteriores, xa que todo o concerto estará baseado nun conto inventado polo alumnado de Linguaxe Musical da escola. A actuación será ás 19:30, na Casa da Cultura do Milladoiro.

Concerto en Negreira
Alén deste concerto no Milladoiro, parte do alumnado da EMMA tamén realizará unha actuación na Casa da Cultura de Negreira. Neste concerto, no que participarán preto de 90 alumnas e alumnos da escola, os grupos de violíns interpretarán, entre outras, cancións do grupo británico Rolling Stones e mesmo unha canción popular polaca; mentres que pola súa banda, os grupos de frautas e de guitarras optarán por bandas sonoras de filmes como a Pantera Rosa ou o Inspector Gadget. O alumnado de canto interpretará algunha canción popular africana, mentres que os combos tocarán temas de Pop clásico como, por exemplo, o mítico tema Proud Mary, dos Creedence Clearwater Revival. Por último, o alumnado de coro e de Linguaxe Musical interpretarán desde unha canción de creación propia, a un tema popular africano e mesmo unha canción tradicional portuguesa. Ademais destes temas, cada grupo tamén interpretará outros de diferentes estilos.

O concerto na Casa da Cultura de Negreira celebrarase o xoves, 22 de xuño, ás 18:00 horas. Haberá servizo de autobuses, con paradas no Milladoiro, Bertamiráns e Aldea Nova, para todas as nenas e os nenos que participen nesta actuación no concello veciño.