- Tematica
A Concellaría de Benestar Social e Promoción da Saúde, dentro do programa SaúdeAndo, organiza un total de 38 andainas destinadas a persoas de todas as idades ao longo de todo este ano 2023. Así, realizaranse 19 rutas circulares con saída dende o centro de saúde do Milladoiro e outras 19 dende o de Bertamiráns. Durante o mes de xaneiro xa tiveron lugar tres das saídas programadas, os días 12, 16 e 19. Ao longo de febreiro realizaranse outras catro andainas, dúas en cada unha das vilas (os xoves 2 e 16 dende Bertamiráns e o 9 e 23 dende O Milladoiro).
As sesións teñen lugar ás 17:30 horas, alternando cada xoves entre os centros de saúde do Milladoiro e de Bertamiráns, e os participantes sempre van acompañados dun monitor de marcha nórdica, que instrúe ás persoas que desexen voluntariamente practicar esta modalidade. Deste xeito dáse a coñecer a marcha nórdica e os beneficios que esta produce na saúde: corrección postural, coordinación, descargue de xeonllos e costas, traballo de tren inferior e superior, maior gasto enerxético...
As rutas teñen unha dificultade media-baixa e duran entre unha hora e unha hora e media, e non é necesaria inscrición previa. A Concellaría busca, a través desta actividade, promover a actividade física e a redución do sedentarismo entre a veciñanza amesá, independentemente da súa idade e condición física. Así mesmo, outro dos obxectivos é a formación de grupos estables que poidan funcionar de forma autónoma, saíndo a camiñar máis acotío. Deste xeito, a actividade serve como un elemento de socialización para coñecer persoas cas mesmas afinidades e intereses.
Por outra banda, a iniciativa busca dar a coñecer a parte máis urbana do concello e as posibilidades que este ofrece para realizar distintas rutas; así como favorecer a mobilidade da cidadanía entre ambos núcleos, ao ter lugar as citas tanto no Milladoiro como en Bertamiráns, de forma alterna.
No Milladoiro organízanse 19 andainas, nos días 12 e 16 de xaneiro; 9 e 23 de febreiro; 9 e 23 de marzo; 20 de abril; 4 de maio; 1, 15 e 29 de xuño; 7 e 21 de setembro; 5 e 19 de outubro; 2, 16 e 30 de novembro e 14 de decembro.
Pola súa banda, Bertamiráns conta con 19 saídas, os días 19 de xaneiro; 2 e 16 de febreiro; 2, 16 e 30 de marzo; 13 e 27 de abril; 11 e 25 de maio; 8 e 22 de xuño; 14 e 28 de setembro; 26 de outubro; 9 e 23 de novembro e 7 e 21 de decembro.
Nova andaina saudable este sábado, 4 de febreiro
Ademais, a Concellaría de Promoción da Saúde segue tamén coa súa programación de andainas saudables durante as fins de semana, que se organizan unha vez ao mes e buscan complementar as actividades levadas a cabo co programa SaúdeAndo, completando recorridos de maior dificultade.
Este sábado, 4 de febreiro, farase unha ruta de once quilómetros pola vila de Porto do Son, que arrinca na praia das Furnas e recorre diversos puntos do concello, tanto a carón do mar como pola zona de interior.
Novas relacionadas:
AMS GO!: "SaúdeAndo organiza case 40 andainas durante 2023"
El Correo Gallego: "Rutas desde los centros sanitarios con SaudeAndo"
