[01-10-2011] O Concello de Ames oferta novas prazas para o programa Sanauga debido ao gran nivel de acollida da actividade entre os veciños e veciñas amienses. A Oficina de Voluntariado de Ames abriu o prazo de inscrición de Sanauga o 26 de setembro e en dous días rematáronse as 45 prazas dispoñibles. Ante a numerosa demanda, a Concellaría de Deportes, Tempo Libre e Voluntariado decidiu ampliar en 28 prazas a oferta nesta iniciativa acuática para persoas maiores ou con algún tipo de discapacidade. Deste xeito, todas aquelas persoas que o desexen aínda están a tempo de inscribirse e participar nesta actividade. Porén, deben darse presa posto que son moitas as persoas interesadas. As inscricións poden realizarse os luns e os mércores na Casa da Cultura do Milladoiro das 9.00 h ás12.00 h e na de Bertarmiráns de luns a venres en horario de 9.00 h a 14.00 h.
O programa acuático Sanauga, xestionado pola Oficina de Voluntariado de Ames, aumenta o número de prazas dispoñibles debido a gran demanda rexistrada. O 26 de setembro abriuse o prazo de inscrición ofertando as 45 prazas iniciais. En dous días, nas OVA do Milladoiro e de Bertamiráns xa estaban ocupadas todas as prazas dispoñibles. Porén, o número de persoas que se achegaban ao lugares de inscrición continuaba crecendo e a lista de agarda facíase cada vez máis longa. Ante esta situación, o Concello de Ames, a través da Concellaría de Deportes, Tempo Libre e Voluntariado, decidiu ofrecer 28 novas prazas para que o maior número posible de veciños e veciñas amienses poidan gozar deste programa saudable. Con todo, unha vez se rematen as prazas. os e as interesados/as poderán continuar inscribíndose xa que pode haber baixas de última hora.
Estas 28 novas prazas se dividirán en dúas quendas de 14 persoas. Na primeira delas, as clases desenvolveranse os luns e os mércores das 12.15 h ás 13.00 h, mentres que na segunda, os alumnos e alumnas só terán clase os vernes de 10 a 10.45 horas. Deste xeito, son cinco as quendas que se desenvolven ao longo deste curso.. As tres primeiras quendas asignadas terán lugar os luns e os mércores. A primeira en horario de 9.15 h a 10.00 h; a segunda, de 10.45 h a 11.30 h; e a terceira, das 11.30 h ás 12.15 h.
Sanauga está destinado a persoas maiores, con máis de 60 anos, e a persoas que teñan algún tipo de discapacidade sempre que presenten un informe médico que o acredite. Durante nove meses, os e as asistentes desenvolverán na piscina municipal da Telleira numerosas actividades acuáticas beneficiosas para a súa saúde. O programa ten como obxectivo mitigar as doenzas musculares e óseas dos e das asistentes e favorecer a mobilidade e benestar físico. Sanauga xira, fundamentalmente, en torno á ximnasia acuática e consiste na realización de actividades aeróbicas que non supoñen un alto rendemento nin desgaste físico.
Para máis información, os interesados e as interesadas en participar no programa Sanauga poderán resolver as súas dúbidas chamando aos teléfonos da Casa da Cultura de Bertamiráns, o 981 883 703, e ao da Casa da Cultura do Milladoiro, o 981 535 940, ou ben no correo electrónico voluntariado@concellodeames.org.