O obradoiro de regueifa é unha sesión lúdica, interactiva e moi divertida. Os nenos e nenas participantes xogarán coas palabras e coa música para achegarse á arte de regueifar, un divertimento creativo e emocionante que crea novos vínculos de apego.

As persoas encargadas de impartir o taller serán Lupe Blanco e Josinho da Teixeira. Ambas son dúas das voces imprescindibles na expansión actual da regueifa, e levan o seu talento por toda Galicia e por fóra das súas fronteiras, a colexios, institutos e mesmo á rúa.

Participar na actividade é de balde, e as persoas interesadas en inscribirse só teñen que enviar un correo electrónico ao enderezo normalizacion@concellodeames.gal no que se indiquen nome e apelidos das persoas asistentes, teléfono de contacto e idade das crianzas que vaian participar. O prazo de inscrición está aberto dende hoxe, día 20 de abril, e ata o vindeiro xoves, 27 de abril. As prazas asignaranse respectando a orde de recepción das solicitudes.

O programa Apego: actividades, formación e recursos para as familias

O programa Apego é un proxecto colaborativo no que participan varios concellos, entre os que se inclúe Ames, e que vai dirixido ás familias que estean a esperar un bebé ou que teñan crianzas entre 0 e 6 anos. O seu obxectivo é promover, apoiar e normalizar o uso do galego na socialización da primeira infancia, empregando distintas actividades e recursos.

As familias interesadas en sumarse á iniciativa poden facelo poñéndose en contacto co Servizo de Normalización Lingüística do Concello de Ames, escribindo un correo a normalizacion@concellodeames.gal ou chamando ao número de teléfono 662 377 215. Así mesmo, tamén poden facelo cubrindo o formulario Súmate ao apego”, que está dispoñible na páxina web do programa, apego.gal.