[28-12-2015] Esta mañá estaba prevista unha xuntanza dos voceiros dos grupos municipais do Concello de Ames, pero finalmente non se celebrou porque se acadou un acordo dos grupos á proposta do goberno municipal. O alcalde de Ames, José Miñones, chamou ao teléfono aos voceiros dos grupos municipais e chegou a un acordo para cambiar o pleno ordinario do mes de decembro. Finalmente, acordouse por unanimidade celebrar o devandito pleno o vindeiro martes, 12 de xaneiro de 2016, ás 20:30 horas.
Cómpre lembrar que os voceiros dos grupos municipais amesáns reuníronse o pasado día 17 de decembro, tralo remate do pleno extraordinario, para debater a fixación da data do pleno ordinario de decembro. A proposta feita polo goberno, que foi aceptada polos representantes de todos os grupos da oposición, agás o Partido Popular, era a de celebrar o pleno o luns día 21 de decembro.
Ante a postura adoptada polo voceiro do Partido Popular, celebrouse unha xunta de voceiros o venres 18 de decembro. Esta segunda reunión foi convocada para intentar consensuar a data do pleno, pero nin o voceiro do grupo municipal do Partido Popular nin outro membro do grupo asistiron á convocatoria.
Ante a falta de consenso resolveuse que, seguindo o establecido no pleno de organización, o pleno ordinario convócase o último xoves de decembro, a menos que este día coincida cun festivo. O día 31, derradeiro xoves de decembro, non é festivo, polo que estaba previsto que se celebrara o pleno ordinario este xoves, 31 de decembro, ás 20:30 horas.
Acordo por unanimidade
Esta mañá estaba prevista unha xuntanza dos voceiros dos grupos municipais do Concello de Ames convocada o pasado martes ao mediodía. O alcalde de Ames, José Miñones, chamou ao teléfono aos voceiros dos grupos municipais e chegou a un acordo para adiar o pleno ordinario do mes de decembro. Finalmente, acordouse por unanimidade celebrar o devandito pleno o vindeiro martes, 12 de xaneiro de 2016, ás 20:30 horas.
O alcalde de Ames, José Miñones, explica que “sempre quixemos acordar unha data alternativa para celebrar o pleno do 31 e ata en tres ocasións tratamos de chegar a un acordo. A proposta que hoxe transmitín aos voceiros/as dos grupos foi aceptada e dá mostra da capacidade de consenso deste goberno. Quero destacar a dispoñibilidade coa que sempre me atopei por parte da maioría dos grupos que entendían que adiantar o pleno ao día 21 de decembro aforraríalle cartos ao Concello”.
“A pesar de non ter podido acordar esa data estamos satisfeitos de que finalmente teñamos conseguido cambiar o pleno de decembro para o día 12 do vindeiro mes podendo darlle contido máis aló dos rogos e preguntas", remata dicindo Miñones.
Contido relacionado
El Correo Gallego: "La Corporación de Ames llega a un acuerdo y fija el pleno para el 12 de enero"