O salón de plenos da Casa do Concello acollerá este martes, 18 de novembro, ás 10.00 horas, un pleno extraordinario no que a Corporación municipal debaterá sobre a aprobación do suplemento de crédito 4/2025, financiado con remanente de tesourería, para gastos xerais por baixas por anulacións, co obxectivo de poñer en marcha unha nova campaña dos Bonos Consuma.

Esta campaña ten como obxectivo contribuír a dinamizar as vendas e reforzar o consumo de proximidade, garantindo así o mantemento do comercio como motor económico e como servizo público de primeira necesidade. O importe da campaña ascendería a 60.000 euros, importe que non estaba previsto nos créditos inicias do orzamento municipal para o exercicio 2024 prorrogado para 2025, polo que é necesario dotar de crédito adecuado e suficiente a través dunha modificación de crédito.

A través desta liña de axudas, o Concello pretende apoiar directamente os pequenos establecementos comerciais, fomentando o acceso da cidadanía ao comercio da súa contorna. O comercio de proximidade desempeña unha función esencial non só dende o punto de vista económico, senón tamén social, actuando como xerador de emprego e como elemento de cohesión comunitaria.

Esta campaña non pode demorarse ata o exercicio 2026, xa que é neste momento cando o Concello dispón do financiamento necesario. Ademais, a súa posta en marcha a finais do exercicio, coincidindo coa campaña de Nadal, permitirá incentivar que a poboación realice as súas compras no comercio local, evitando así o desprazamento a outros concellos de maior tamaño.

O importe da campaña ascendería a 60.000 euros e vai ser sufragado con 20.000 euros de crédito sobrante da convocatoria de subvencións da promoción do comercio 2025, e 40.000 euros procedentes do remanente de tesourería para gastos xerais.

Ademais, neste pleno extraordinario darase conta da renuncia de Carmen Porto Rey como concelleira de Planificación e Xestión Educativa e Mocidade.

Novas relacionadas:

El Correo Gallego: "Ames busca un suplemento de 60.000 euros para reactivar sus Bonos Consuma"

Lindeiros: "Ames leva a pleno un novo suplemento de crédito"

Xornal de Compostela: "O Concello de Ames debaterá unha nova campaña dos Bonos Consuma nun pleno extraordinario"