O pleno ordinario de decembro comezou co alcalde dando conta ao Pleno da Corporación dos decretos ditados pola Alcaldía dende a última sesión plenaria ordinaria. De seguido, aprobouse por unanimidade a acta da sesión ordinaria do 25 de novembro de 2021. Posteriormente, pasouse ao debate dos asuntos recollidos na orde do día para deliberación e acordo.

O primeiro punto abordado foi a rectificación do Inventario municipal que foi aprobada por unanimidade. A concelleira de Transparencia, Vanessa Vidal,  que xestiona as áreas de xestión patrimonial e inventario municipal de bens, explicou que “este procedemento servirá para seguir traballando na actualización e aprobación do Inventario municipal, cuestión moi necesaria no noso concello. A última actualización data do ano 1997 e ata o ano 2020 non se fixo ningunha actuación no Inventario. En 2020 realizáronse dúas incorporacións (unha delas foi a do centro coworking A Proa) e unha modificación”. Ademais, engadiu que “este Goberno comprométese a que durante o primeiro trimestre de cada ano vaise traer ao pleno unha actualización anual do mesmo”.

Nesta ocasión vanse incorporar 8 bens inmobles de gran importancia como son a Casa da Cultura de Bertamiráns; o complexo deportivo de Bertamiráns; o centro deportivo municipal da Telleira; as oficinas da Policía Local; as oficinas de Urbanismo; a depuradora de Quintáns, na Ameixenda; a escola infantil municipal A Madalena; e maila escola infantil municipal O Bosque. Os grupos da oposición mostráronse a favor de dita actualización do Inventario e animaron a á concelleira de Transparencia a que se siga traballando para continuar con dita actualización.

Creación dunha área de autocaravanas en Bertamiráns
Outro dos asuntos que se aprobaron por unanimidade foi a solicitude dunha subvención á Deputación provincial da Coruña para a creación dunha área de autocaravanas en Bertamiráns. Dita área disporía de 15 prazas para autocaravanas, unha delas adaptada para persoas con discapacidade, que estaría situada na zona das Pateiras, ao carón do campo da festa da Peregrina.

O concelleiro de Turismo, Manuel Lens, explicou que “o Concello de Ames leva dende o ano 2004 apostando polo turismo de autocaravanas, de feito fomos o segundo concello galego en crear unha área destas características, despois de Tui, e fomos no ano 2019 o primeiro concello galego en contar con dúas áreas de autocaravanas. Aínda así unha delas, a de Bertamiráns, é escasa, polo que decidimos crear una nova área nesta localidade, xa que este tipo de turismo está en auxe”.

Deste xeito, vaise solicitar á Deputación da Coruña a súa colaboración económica no financiamento das obras de creación da área de autocaravanas en Bertamiráns cun orzamento de 50.982,26 euros. O importe solicitado á Deputación será do 80% (40.785,81 euros) e a achega municipal será do 20% (10.196,45 euros).

Neste punto, o concelleiro de Ames Novo, Quique Costas, pediulle ao Goberno municipal que se elabore un plan estratéxico de turismo. Ante dita petición o concelleiro de Turismo adiantou que proximamente se vai presentar dito plan.

Gratificacións e horas extras
Na mesma sesión aprobouse por unanimidade o incremento da cantidade global destinada á asignación de gratificacións, horas extras e horas complementarias no orzamento 2021. Aprobados os Orzamentos de 2021 autorizouse unha cantidade máxima de gratificacións, horas complementarias e horas extraordinarias do persoal de 73.319,48 euros. No mes de xullo iniciouse un expediente de ampliación de crédito das partidas para adaptalas ás novas necesidades quedando unha cantidade total de 180.253,47 euros. Ante o remate do ano e visto que dita partida resultou insuficiente por mor de substitución de baixas, paternidades/maternidades, e necesidades de horas extras de prestación nos distintos servizos, aprobouse en Pleno un novo incremento da partida que acadará un total para o ano 2021 de 225.000 euros.

Continuidade na prestación do servizo do Ciclo Integral da Auga
A continuidade da prestación do servizo do Ciclo Integral da Auga pola concesionaria do servizo, Espina & Delfín SL, a partir do 31 de decembro de 2021, foi un dos puntos que máis debate creou. Finalmente foi aprobado co voto a favor dos membros do Goberno municipal. Os/as concelleiros/as do grupo municipal popular e Jose Ramón Oulego, de Ciudadanos, abstivéronse, mentres  que o edil Quique Costas, de Ames Novo, votou en contra.

No pleno do 29 de decembro de 2016 adxudicouse o contrato de xestión do servizo público Ciclo Integral da Auga á Espina & Delfín. A prestación iniciouse o 16 de xuño de 2017 e a vixencia foi de dous anos máis outros dous de prórroga. Rematados ditos prazos, acordouse no Pleno do 29 de abril de 2021 a continuidade do contrato ata o 31 de decembro de 2021. Ante o próximo vencemento do prazo de prestación do servizo, dado que se trata dun servizo público esencial e que a municipalización do ciclo integral da auga é un proceso complexo que requirirá dun prazo máis amplo, é preciso dar continuidade ao servizo do ciclo integral da auga mantendo as mesas condicións ata que se inicie a prestación directa do servizo e en todo caso ata a data límite do 31 de decembro de 2022.

Os partidos da oposición criticaron o xeito no que se está tramitando a continuidade de dito servizo. Jose Ramón Oulego, de Ciudadanos, dixo que se tería que empezar antes co proceso de municipalización da auga ou licitar o servizo, cando menos por un ano, para ter cobertura legal. Neste sentido tamén se manifestou Javier Olmo, do Partido Popular, que indicou que o Goberno non ten un plan B por se se demora o cambio de modelo de xestión do ciclo integral da auga. Engadiu que dende o Pleno do pasado 29 de abril de 2021, onde se aprobou a continuidade do contrato, e tendo en conta que se alongará ata o 31 de decembro de 2022, van a pasar case dous anos, nos que non houbo avances, salvo a validación da memoria xustificativa por parte da Comisión. Por último, dixo que deberían haber licitado de novo o servizo ata que se realice o cambio de xestión do servizo.  

Quique Costas, de Ames Novo, queixouse da lentitude coa que se está xestionando o proceso de municipalización. Así dixo que pasou moito tempo dende maio de 2015, momento no que se asinou un acordo de investidura entre o Goberno municipal e mailo grupo Ames Novo, no que se recollía a municipalización de dito servizo. “Isto non foi unha prioridade do Goberno municipal durante o mandato anterior nin o é neste. Eu sei que é un asunto complexo, pero a paciencia incluso en política ten un límite”.

A concelleira de Economía e Facenda, Genma Otero, explicou que “dende 2015 si que se traballou para tratar de avanzar na municipalización do ciclo integral da auga. Hai que ser responsables e a municipalización deste servizo non é un tema menor. Houbo que facer un traballo previo e tivemos que contratar un técnico específico para o Ciclo integral da auga. Para estudar a viabilidade da municipalización deste servizo tiñamos que ter datos e iso non sucedía. Non sabiamos o estado da rede, non sabíamos os investimentos que tiñamos que facer, etc. Agora dispoñemos dunha memoria xustificativa, isto garante que o proceso de municipalización se vai a realizar do xeito máis eficaz posible. Aínda así quedan aspectos moi importantes por determinar como son a subrogación de persoal sobre o que non queremos dar pasos en falso”.

Prórroga do contrato e revisión de prezos coa empresa URBASER SL
Ademais, o Pleno aprobou por unanimidade a sétima prórroga, polo prazo de seis meses, do contrato asinado coa empresa Urbaser SA, que se encarga da limpeza viaria e do Punto Limpo do Concello de Ames. Dita prórroga comprendería dende o 15 de xaneiro de 2022 ata o 14 de xullo de 2022 e sería por un importe de 334.799,18 euros. Sobre este asunto o alcalde e concelleiro de Obras e Servizos Básicos, Blas García, explicou que “está previsto que no pleno do vindeiro mes de xaneiro se poida debater a adxudicación definitiva do expediente de licitación do servizo de limpeza viaria”. Deste xeito, a nova empresa adxudicataria disporá de case seis meses para ter todo preparado para comezar a prestar o servizo.

Tamén se aprobou por unanimidade a revisión de prezos coa empresa Urbaser SA. Dita actualización terá efecto dende o 1 de xaneiro de 2021. Deste xeito, corresponde facer a revisión do canón principal e tamén do canón correspondente coa ampliación do contrato aprobado no pleno do 26 de maio. A revisión sae favorable ao Concello por un importe de 3.160,67 euros.

Regulación de límites de velocidade a 30 km/h
Por outra banda, abordáronse dúas propostas: a primeira, presentada por Ames Novo sobre a adecuación dos límites de velocidade en diversas estradas do concello, logo do establecido no Real Decreto 970/2020, que modifica os límites de velocidade en vías urbanas e que entrou en vigor o pasado día 12 de maio de 2021.

A proposta instou ao Pleno a dirixirse á Consellería de Infraestruturas da Xunta de Galicia a fin de que proceda a fixar o límite de velocidade en toda a avenida da Peregrina en 30 km/h. Tamén solicita dirixirse á Deputación Provincial para fixar o límite de velocidade a 30 km/h na rúa da Madalena e na DP-0250 no tramo que se corresponde coa avenida Alcalde Lorenzo e nas proximidades do CEIP Agro do Muíño. Ademais propón comunicarlle á Demarcación de Estradas do Estado en Galicia que se elabore un plano de regulación semafórica na avenida de Rosalía Castro que permita minorar a velocidade media á que circula o tráfico por dita avenida.

Sobre o punto 4 no que se recolle elaborar un plano de regulación semafórica na avenida de Rosalía Castro que permita minorar a velocidade media á que circula o tráfico por dita avenida, José Ramón Oulego, de Ciudadanos, dixo que non estaba de acordo con este punto xa que podería provocar aínda máis tráfico na avenida de Rosalía de Castro. Pablo Beiroa, do Partido Popular, indicou que estaba de acordo coa proposta, pero non entendía o punto 4 porque nunha das xuntanzas da plataforma da N-550 acordouse coa Policía Local axustar a rede de semáforos da avenida de Rosalía de Castro. Finalmente, Quique Costas, de Ames Novo, accedeu a retirar o punto 4 da proposta.

A concelleira de Mobilidade, Beatriz Martínez, fixo un relatorio das actuacións que está realizando o Goberno municipal sobre as cuestións que recolle a proposta. “Consideramos que xa estamos traballando en todos os puntos que indicas na proposta polo que nos vamos abster”, explicou a concelleira de Mobilidade. Finalmente, a proposta foi aprobada co voto a favor dos concelleiros/as do grupo municipal popular e do grupo mixto, mentres que os membros do Goberno municipal abstivéronse.

Moción dirixida ao Goberno de El Salvador
Na segunda proposta, presentada polos grupos municipais socialista, Contigo Podemos e Ames Novo, instouse ás autoridades da República de El Salvador a cumprir a sentenza do Tribunal Iberoamericano de Dereitos Humanos no chamado “Caso Manuela”, que insta ao goberno dese país a reformar a lei que penaliza calquera tipo de aborto, incluso o terapéutico. Esta proposta foi aprobada por unanimidade e todos os grupos coincidiron na importancia de reformar dita lei.

A proposta chegou a Ames e ao resto dos Concellos galegos a través de AGARESO (Asociación Galega de Comunicación para o Cambio Social) que quere lograr que se estableza un protocolo de atención das urxencias obstetricias e que se protexan os datos das pacientes, cuestión que, segundo AGARESO se vulneran con moita frecuencia.

Novas relacionadas

La Voz de Galicia: "Ames prorroga un año la gestión externa del agua antes de municipalizarla"

AMSGO!: "O Pleno aproba a actualización do inventario municipal, que inclúe 8 inmobles"

Lindeiros: "Novas prórrogas na xestión do lixo e o ciclo da auga de Ames"