Rede Española de Cidades Saudables
O pasado 24 de novembro de 2015 o Concello de Ames adheriuse formalmente á Rede Española de Cidades Saudables (RECS), en cumprimento do acordo plenario do 24 de setembro de 2015. Como consecuencia da anterior adhesión, o 26 de maio de 2016, o Concello de Ames incorporouse á Estratexia de Promoción da Saúde e Prevención no Sistema Nacional de Saúde (SNS). Para a implementación local da estratexia, débense desenvolver dúas accións que son a identificación de recursos para a promoción da saúde e a prevención (mapa de recursos comunitarios) e a constitución dunha mesa de coordinación intersectorial. O mapa de recursos comunitarios xa foi elaborado e remitido á Rede española de Cidades Saudables, quedando pendente a constitución da devandita mesa. Coa aprobación do regulamento de creación de dita mesa, agora haberá que tramitar a súa constitución.

Programa Xantar na casa e parque Compostela rupestre
Asemade, aprobouse o convenio de colaboración entre o Consorcio Galego de Servizos de Igualdade e Benestar e a Concellería de Política Social do Concello de Ames para o desenvolvemento do programa Xantar na casa. Deste programa poderán beneficiarse as persoas maiores de 60 anos, que teñan limitada a súa capacidade de autonomía persoal e sen rede de apoio que puidese suplir tal situación. Tamén poden ser beneficiarias as persoas dependentes que carezan de apoio familiar e que requiren de axuda para a preparación de alimentos, así como as persoas menores de 60 anos que están en situación de exclusión social.

Tamén se aprobou a sinatura do convenio que recolle as bases de cooperación entre a Deputación da Coruña e os concellos de Ames, Boqueixón, Brión, Santiago de Compostela, Teo, Val do Dubra e Vedra para regular o proxecto do parque Compostela rupestre. Debido a importancia histórica, arqueolóxica e patrimonial dos petróglifos existentes no termo municipal de Ames e nos concellos da contorna, propúxose por parte da Deputación da Coruña a creación dunha entidade intermunicipal para a xestión colectiva da arte rupestre (petróglifos) co obxectivo de poder financiar determinadas actuacións neste ámbito.

Comparecencia do alcalde e construción dun Centro de Día
Por outra banda, aprobouse a solicitude de comparecencia do alcalde, solicitada polo concelleiro Ramón García Argibay o pasado 27 de febreiro de 2018. A comparecencia do rexedor municipal será no vindeiro pleno que se convoque. Por último, aprobouse un acordo institucional para a construción dun Centro de Día público en Ames. A través de dito acordo ínstase á Xunta de Galicia a que subvencione actuacións de atención aos maiores residentes no Concello de Ames, especialmente, para que melloren así a súa calidade de vida e benestar desde un envellecemento activo acorde coas súas posibilidades vitais.

Mediante dito acordo, tamén se acorda, iniciar os trámites necesarios para a construción dun Centro de Día no concello de Ames non só para a atención do actual colectivo da terceira idade deste termo municipal, senón tamén como unha medida previsora de atención ao colectivo de residentes de máis de 55 anos (3.142 persoas) que pronto necesitará este tipo de servizo asistencial. Trátase dunha iniciativa, apoiada por todos os grupos municipais da corporación, que foi promovida inicialmente polo concelleiro non adscrito, Javier López. Todos os grupos fixeron achegas ata chegar a un texto final conxunto.

O primeiro punto que se aprobou foi o suplemento de crédito 1/18. Co remate do exercicio 2017, constatouse a existencia de varios proxectos de investimento pendentes aínda de remate, financiados todos eles con recursos afectados. No exercicio 2016 o Pleno acordara o cambio de destino dos excesos afectados de préstamos do 2010 e resto de préstamos anteriores e excesos de ingresos de carácter finalista, para destinalos a novos investimentos. O feito de non terse recoñecido obrigas contra os mesmo (ou non telo feito pola totalidade do importe do proxecto), determina a existencia de remanentes de crédito en cada unha das aplicacións orzamentarias que amparan as actuacións. Estes remanentes foron xa incorporados ao exercicio 2018. Algunhas das actuacións recollidas están sendo executadas no exercicio 2018, mentres que outras actuacións xa se acometeron ou vanse acometer financiándose con novos recursos, considerando máis conveniente destinar ditos excesos a novos investimentos.

Os remanentes de crédito incorporados ao exercicio 2018 que non se atopan comprometidos son os seguintes: obras de acometida eléctrica para o bombeo de Novais -financiada co canon do Ciclo integral da auga- (26.803,57 euros); a ampliación do alumeado público en distintas parroquias (8,21 euros); achegas da comisión parroquiais ou veciñas 2017 (22.822,46 euros); honorarios dos técnicos da marquesiña do Agro do Muíño -baixa no orzamento- (513,45 euros); reparación de pontella e canalización de augas pluviais no lugar de Lamas -canalización realizada en 2017- (14.845,02 euros); e vehículo para o departamento de obras -baixa na adxudicación- (1.000 euros). En total, todos estes importes suman unha contía de 65.992,71 euros.

Deste xeito, acordouse anular a incorporación de remanentes 2/2018 nos devanditos importes para podes destinar o exceso de investimentos a estas novas actuacións: acondicionamento dos parques caninos (5.000 euros); peche do muro do cemiterio municipal (15.992,71 euros); e adecuación do acceso á praza de Correos no Milladoiro (45.000 euros). Todos estes investimentos suman unha contía de 65.992,71 euros. De xeito parello a este punto, tamén se aprobou o cambio de finalidade dos recursos afectados do préstamo no 2010 e resto de préstamos anteriores para a realización de novos investimentos. Para poder levar a cabo os devanditos proxectos é preciso cambiar o destino dos recursos económicos e tramitar o correspondente expediente de modificación de crédito na modalidade de suplemento de crédito.

Modificación do regulamento do Fondo de Acción Social
Por outra banda, aprobouse a primeira modificación puntual do regulamento do Fondo de Acción Social do Concello de Ames. O Pleno ratificou o acordado en Mesa Xeral de Negociación o pasado 19 de decembro de 2017, co obxectivo de modificar puntualmente o artigo 12 de dito regulamento para que as partidas da primeira e terceira sección queden excluídas das porcentaxes de reparto estipulado, e proceder ao reparto da porcentaxe que se establecía para a sección terceira no resto de seccións.

Deste xeito, previamente á tramitación de calquera outro tipo de subvención, resolveranse as correspondentes ás subvencións por fillos/as, cónxuxe ou calquera persoa a cargo do beneficiario con discapacidade física, psíquica ou sensorial ou persoas en situación de dependencia e as axudas para tratamentos sanitarios non contemplados na sanidade pública, que terán a consideración de preferentes. En calquera caso, as contías destinadas a estes conceptos serán aboadas na súa integridade ata o límite do total asignado para o conxunto da acción social establecido para cada exercicio. Asemade, modifícase a distribución das porcentaxes no citado artigo 12 para axudas contempladas na sección terceira.

Contido relacionado

El Correo Gallego: "Unanimidad amaiana para acceder a Xantar na Casa"
La Voz de Galicia: "El parque comarcal Compostela Rupestre arranca con 500.000 euros"
Compostela 24 Horas: "La corporación municipal de Ames aprobó por unanimidad todos los puntos que recogía la orden del día"
La Voz de Galicia: "Ames reclama un centro de día y se adhiere a Xantar na casa"
Lindeiros: "O pleno de Ames reclama un centro de día para o concello"