Esta maña presentouse unha nova edición desta iniciativa, que naceu no ano 2013, con vontade de continuidade e con vocación de converterse nunha cita ineludible dentro do panorama cultural galego. Este festival terá lugar os días 4 e 11 de xullo e, aínda que a actividade central será a música, tamén haberá outros espectáculos escénicos. Para poder desenvolver este festival o Concello de Ames conta coa colaboración da Rede Cultural da Deputación da Coruña, do programa Cultura no Camiño 2014, da Consellería de Cultura, Educación e Ordenación Universitaria e da Rede de Dinamización Lingüística da Xunta de Galicia.

O alcalde de Ames, Santiago Amor, a concelleira de Cultura, María Eugenia Martín, e o secretario xeral de Política Lingüística, Valentín García Gómez, foron os encargados de facer a presentación da segunda edición deste festival. O secretario xeral de Política Lingüística, Valentín García Gómez, destacou que “é un orgullo volver a colaborar con esta iniciativa que se desenvolve nun marco incomparable como é o Pazo da Peregrina de Bertamiráns”. Ademais, explicou que este ano “a Rede de Dinamización Lingüística colabora co espectáculo Os sons do vento que pasa, que tratará de ligar a proximidade que existe entre Galicia e Portugal a través da súa lingua. Este espectáculo percorrerá 36 concellos de Galicia”. Por último, Valentín García, gabou o traballo que está facendo o Concello de Ames en prol da dinamización lingüística.

Nesta presentación tamén estiveron o artista Dani García, que representará o espectáculo Don Gelati, e Monserrat Crespo, que pertence ao grupo Leilía. Monserrat Crespo destacou o “ambiente familiar que ten este evento” e afirmou “para min é un orgullo volver a estar neste festival, xa que o ano pasado xa estiven neste evento co grupo Pesdelán. Nesta ocasión estarei co grupo Leilía e presentaremos o noso último traballo, CONsentimento”. Por outra banda, Dani García tamén salientou a beleza do Pazo da Peregrina que xa coñecía debido a que estivo vivindo dous anos en Bertamiráns e incidiu en para el “é un orgullo formar parte do cartel deste festival de verán”.

O alcalde de Ames, Santiago Amor, foi o encargado de pechar esta presentación. O rexedor municipal agradeceu “o traballo do departamento de Cultura por poñer en marcha este evento, que naceu no ano 2013, co obxectivo de perdurar no tempo e ir medrando ano a ano”. Santiago Amor destacou “a calidade dos grupos que este ano forman o cartel do festival de verán Encontros Culturais no Pazo 2014” e animou “a todas as familias amienses a que se acheguen ao Pazo da Peregrina os venres 4 e 11 de xullo para gozar deste evento musical”.

Programa do festival de verán
O programa do festival de verán Encontros Culturais no Pazo 2014 comezará o venres 4 de xullo, ás 20:00 horas coa actuación de Cé Orquestra Pantasma. Trátase dun espectáculo de animación musical. O clásico home orquestra na súa versión para os máis pequenos, con divertidas melodías e cantigas infantís para que participen xogando, cantando e bailando. De seguido, ás 21:30 horas, actuará o grupo amiense A Requinta da Amaía, que impartirá un obradoiro baseado na participación do público no que, con música en directo, aprenderá unha serie de xogos e danzas de grupo sinxelas e tamén pasos de bailes agarrados (pasodobre, valse, polca, mazurca...).

A actuación principal do primeiro día do festival será o concerto de Os Cempés, que comezará ás 22:30 horas. Este grupo presentará o seu último disco, Tentemozo. O repertorio é unha selección de músicas para bailar, as máis fermosas coplas e as mellores melodías do cancioneiro popular, arranxadas polo propio grupo, agás as novas composicións.

O festival de verán Encontros Culturais no Pazo 2014 continuará a seguinte semana, o venres 11 de xullo. Nesta ocasión, a xornada comezará ás 20:00 horas coa actuación de Dani García, que representará o espectáculo Don Gelati, unha comedia máxica onde a expresión corporal substitúe ás palabras e a comunicación co público é constante e dinámica. Principalmente, é un espectáculo de maxia de rúa con grande mobilidade.

Ás 21:30 horas comezará o espectáculo Os sons do vento que pasa, que correrá a cargo de Gonçalo Guerreiro. Trátase dun concerto de fados-pop cantados en galego. Este concerto está promovido pola Rede de Dinamización Lingüística da Xunta de Galicia. Os fados acompañados de guitarra eléctrica e pedal de loops, gardan o seu encanto orixinal, pero gañan unha dimensión contemporánea e singular que seduce tanto á mocidade coma o resto dos públicos.

A segunda xornada deste festival pecharase, ás 22:30 horas, cun concerto do grupo Leilía, que presentará o seu último traballo chamado CONsentimento. Máis de vinte anos despois do seu debut, Leilía volve sorprendernos cun espectáculo maduro e fiel ás súas raizames. Unha coidadosa posta en escena e una orixinal instrumentación sitúan a CONsentimento entre as propostas máis interesantes da música de raíz actual.

Obxectivos do festival de verán
O festival de verán, Encontros Culturais no Pazo 2014 ten o obxectivo de impulsar a nosa cultura e a nosa lingua achegándolle á cidadanía produtos culturais de calidade en lingua galega para todos os públicos, especialmente para a mocidade e para un público familiar, debido ás características específicas da poboación deste concello. Tamén se pretende fomentar o interese pola música tradicional, colaborando así na preservación do noso patrimonio inmaterial; dinamizar o e dar a coñecer o patrimonio do Concello de Ames, enchendo de contido cultural un marco singular como é o Pazo da Peregrina de Bertamiráns; e potenciar a participación da cidadanía nas actividades de lecer, de xeito que o público asistente teña un papel activo e non quede só en consumidor pasivo.

Contido relacionado

El Correo Gallego: "Ames achégase á lusofonía dun xeito familiar cos Encontros Culturais"