O Concello de Ames, a través do departamento de Normalización Lingüística, celebrou este sábado a sétima edición da súa Festa do Apego, unha xornada dirixida especialmente ás familias con nenos e nenas e que ten como obxectivo principal fomentar a transmisión da lingua galega. 

Deste xeito, ao longo de todo o día, o Pazo da Peregrina converteuse nun espazo de socialización e de festa no que a través das diferentes propostas de concertos, obradoiros, música, xogos e teatro achegáronse recursos para unha crianza positiva,  creativa e con moito apego.

Xornada de mañá 
A festa deu comezou arredor das 11.00 horas coa actuación teatral de Barquiño de pau, de Tropa de Trapo. Marta Ortiz e Brais das Hortas foron os encargados de ofrecer un espectáculo de teatro de obxectos e música no que as crianzas puideron explorar os sentidos de xeito participativo e divertido ao son de diferentes instrumentos coma o acordeón, a mandola portuguesa, o dizi chinés ou incluso do seu propio corpo. 

Máis tarde, ás 12.30 horas, tivo lugar a proposta de Migallas Teatro coas Brincadeiras da lingua, onde María Campos e Carlos Yus, mediante xogos verbais de participación, cancións, contos, monicreques e outros recursos, ofreceron unha forma divertida e diferente de os máis pequenos puideran coñecer diferentes ditos e recitados da literatura popular infantil de Galicia. 

Ademais destas dúas propostas lúdicas, ao longo de toda á mañá, ao igual que na sesión de tarde, estiveron dispoñibles diferentes espazos de actividades permanentes, onde os máis pequenos puideron gozar de espazos de xogos de mesa, materiais naturais non estruturados para promover a creatividade e o xogo libre, unha ampla variedade de obras infantís para comezar a mergullarse na lectura compartida, un obradoiro de creación de monicreques e outro obradoiro de tatuaxes e chapas con Apego para que todas e todos os cativos puideran levar algún recordo e agasallo á casa. 

Xornada de tarde
Ás 17.00 horas deu comezo a xornada de tarde con dúas actividades simultáneas. Por un lado, tivo lugar o espectáculo-obradoiro Pelica de Burra de Vero Rilo e Luís Iglesias, dirixido aos nenos e nenas máis pequenos de ata 3 anos, no que se combinou  música, tradición, igualdade con xogos de colo ou de cóxegas, arrolos, contos para aprender a transmitirlles apego a quen máis queremos. Por outro lado, para familias con crianzas a partir de 3 anos, desenvolveuse o obradoiro de música tradicional Mulleres, ritmo e tradición de Sabela Olivares. Esta actividade serviu para descubrir o noso patrimonio musical a través da nosa expresión corporal e vocal, para achegármonos dunha forma lúdica e creativa á riqueza da música galega.

A partir das 18.30 horas, tivo lugar o concerto participativo Novas vellas melodías de Pablo Díaz e Rubén Barros, onde o público asistente puido cantar e bailar ao ritmo das cancións máis coñecidas de Pablo Díaz.

A sétima edición da Festa do Apego rematou ás 20.00 horas cun concerto a cargo da Gramola Gominola, presentando o seu último traballo, Non somos 5, somos 7!.

Novas relacionadas: 

El Correo Gallego: "Festa do Apego en Ames: «É moi difícil criar en galego»"

Diario de Santiago: "O Pazo da Peregrina acolleu hoxe a VI Festa do Apego de Ames"

AMSGO!: "O Pazo da Peregrina acolleu a VI Festa do Apego"