Ao longo da madrugada do martes e desa mesma xornada, persoal da brigada de obras municipal estivo levando a cabo labores de tala de árbores e arranxos no alumeado, unhas tarefas que continuaron durante o día de Nadal e que proseguen hoxe.  Este traballo sumouse ao da Policía Local de Ames, que levou a cabo unha intensa labor de vixilancia e respondeu a todos os avisos realizados durante estas xornadas pola poboación amiense.

O persoal da brigada de obras tivo que realizar tala de árbores en distintos puntos do municipio entre os que se atopan: Ameixenda, Cobas (na estrada que une Barcia e a autovía), urbanización Agro do Muíño, lugar de Agrela, Tarrío, o Castro de Ortoño, zona de Os Batáns, Eirapedriña, urbanización Aldea Nova, Portanxil ou Castiñeiro do Lobo. Estas árbores, na súa maioría de pequeno tamaño, obstaculizaban diferentes vías e impedían o paso de vehículos. Tamén se tiveron que retirar algunhas árbores na zona do Ameneiral e na Travesía do Porto, no Milladoiro.

Os operarios tamén acometeron arranxos eléctricos no alumeado público de zonas como Aldea Nova ou distintos puntos da Avenida da Maía, en Bertamiráns. A forte intensidade do vento provocou a caída de sinais de tráfico e que outras quedasen dobradas. O vento tamén afectou a semáforos, farolas e carteis publicitarios de Bertamiráns e do Milladoiro.

 Ademais do vento, as intensas choivas que caeron en Ames provocaron un corremento de terras sobre un camiño situado en Barreiro, parroquia de Bugallido, e anegamentos no paseo fluvial de Bertamiráns, especialmente na zona da Condomiña.

Contido relacionado

El Correo Gallego: "O paso do temporal provocou en Ames máis de 50 incidencias"