Carapuchiña é unha nena duns nove anos. Un día a súa nai encargoulle ir á casa da avoa para que lle levase unha cesta con froita, un tarro de mel e unha botella de viño doce. Polo camiño atopará amigos, aventuras con árbores bailarinas, cancións… e incluso un lobo que fará das súas para intentar papala. A historia está narrada por Plácido, un escritor de contos que, axudado pola súa vella máquina de escribir, traballará arreo para mecanografar o conto máis bonito do mundo enteiro: Carapuchiña Vermella.

Nesta adaptación do clásico dos Irmáns Grimm modernízase a historia e os personaxes do conto para traelos á actualidade. A proposta mestura teatro de actor con manipulación de corpóreos e voz en directo para transmitir aos cativos e cativas valores como a ecoloxía e a igualdade ao mesmo tempo que ensina a reciclar ou as profesións.

Por último, cómpre destacar que Carapuchiña Vermella, O Musical está composto por sete cancións orixinais cantadas en directo e pensadas especialmente para os máis pequenos (Bebé Rebelde; Cara, Cara, Carapuchiña!; Quero ser…; Camiñando polo bosque; Somos todos iguais; Fiareime eu de ti?; e O lobo).

Venda de entradas para os espectáculos infantís
Dende o departamento de Cultura infórmase de que están a venda as entradas dos espectáculos infantís de teatro, música e danza da programación de Nadal. Ditas entradas pódense mercar na Billeteira electrónica municipal. Para iso tan só hai que acceder á páxina principal desta web e premer nun dos dous banner que hai da Billeteira, que están na cabeceira da web ou debaixo da sección de Avisos.