Esta proba está incluída na Dagan Cup, que actualmente é a única competición de supercross que se organiza en Galicia. Trátase dun evento non oficial, interprovincial e non federado, de acordo coa actual normativa galega de deportes, e na que se dan cita os mellores pilotos galegos desta modalidade deportiva xa que actualmente non existe outra proba federada de supercross.

A Dagan Cup 2016 está composta de dez probas, das cales dúas desenvólvense en Ames. Nestes intres está confirmada a celebración de oito probas, as outras dúas están pendentes de pecharse. A proba desta fin de semana é a cuarta en disputarse este ano. Previamente, celebráronse dúas en Vigo e unha en Riveira.

Esta é a primeira proba que se organiza este ano no circuíto SX “Alex de Moure”, que conta con máis de 17.000 metros cadrados de superficie. Este recinto dispón dunhas condicións óptimas tanto para a práctica do deporte como para contemplación desta modalidade deportiva. Ademais, este ano como novidade habilitarase un aparcadoiro gratuíto que se atopa a 200 metros do circuíto.

O prazo de inscrición estará aberto ata a media noite deste xoves, 12 de maio. Na actualidade xa hai máis de 70 pilotos inscritos para participar nesta competición, pero dende a organización agardan incrementar este número. As inscricións realízanse na páxina web: http://www.magmasports.es. Os participantes estarán divididos en oito categorías diferentes: elite, veteranos, promoción, 85 cc, alevín de 6 a 9 anos, alevín de 6 a 11 anos, féminas e hobby que son os que se inician neste deporte.