- Tematica
As instalacións do Squash Club Santiago do Milladoiro acolleron as finais do Campionato de España absoluto de squash, nas que se proclamaron gañadores/as; a galega Marta Domínguez, na categoría feminina, e mailo catalán Iker Pajares, na categoría masculina. O alcalde de Ames, Blas García, e mailo concelleiro de Urbanismo, Administración xeral e Mobilidade, Víctor Fernández, asistiron ás finais de dito campionato e ao acto de entrega de premios.
O Campionato de España absoluto de squash disputouse esta fin de semana na localidade amesá do Milladoiro. Isto foi posible grazas ao Squash Club Santiago do Milladoiro e ao director do torneo, Jesús Souto. O campionato xuntou en Ames aos 60 mellores xogadores/as nacionais que competiron nas categorías masculina e feminina. O torneo disputouse dende o pasado venres nas catro pistas que dispón o Squash Club Santiago do Milladoiro.
A fase previa disputouse o pasado venres. De dita fase previa saíron 8 xogadores que se enfrontaron aos 8 cabezas de serie. Partían como favoritos Iker Pajares, na categoría masculina, e Marta Domínguez, na categoría feminina. Ambos os dous cumpriron os prognósticos e gañaron un novo título nacional absoluto.
Deste xeito, na categoría feminina, a galega Marta Domínguez conseguiu o seu segundo título absoluto nacional ao vencer na final por 3-0 a Pilar Etchechoury. Previamente, impúxose a Montse Fajardo e Icía Rivero tamén por 3-0 en ambos os dous partidos. A terceira posición foi para a tamén galega, Icía Rivero.
Na categoría masculina o titulo foi para o catalán Iker Pajares, que suma o seu terceiro título nacional. Na final impúxose ao tamén catalán, Bernat Jaume, por 3-1. Previamente gañoulle a Pablo Quintana por 3-0 e a Robertino Pezzota por 3-1. Completou o podio Iván Pérez, que gañou o partido para determinar o terceiro posto do campionato ao vencer a Robertino Pezzota.
O alcalde de Ames, Blas García, e mailo concelleiro de Urbanismo, Administración xeral e Mobilidade, Víctor Fernández, asistiron ás finais de dito campionato e ao acto de entrega de premios.
O rexedor municipal destacou “é un pracer contar cun evento deste nivel en Ames, polo que é necesario felicitar a Jesús, Manuel e Miguel, e ao sempre activo Borja Golán. Grazas por convidarme a asistir á final e comprobar a beleza e a dureza deste deporte que será olímpico no 2028. Felicitar aos participantes, e en especial aos gañadores: Marta Domínguez e Iker Pajares”.
Novas relacionadas:
El Correo Gallego: "Marta Domínguez e Iker Pajares hacen buenos los pronósticos y ganan el título nacional de squash"
Ames Go: "Ames acolleu o Campionato de España absoluto de Squash"