Esta charla realízase co obxectivo de que as persoas que viven soas coñezan as diversas modalidades que existen para poder dispor dun servizo de teleasistencia domiciliaria. Por unha banda, a traballadora social do Concello, Alicia Carbia, explicará que na vertente pública existen dúas modalidades para acollerse ao programa de teleasistencia. Unha é a que recolle a lei de dependencia da Xunta de Galicia e outra a que ofrece a Deputación da Coruña. Para poder optar a da Xunta de Galicia hai que ter recoñecido un grao de dependencia, pero non é necesario ter 65 anos. No caso do programa da Deputación da Coruña si que é necesario ter cumpridos os 65 anos. Todos os detalles de cada un destes programas serán explicados nesta charla.

Por outra banda, unha técnica da Cruz Vermella, abordará o servizo de teleasistencia privado, que neste caso ofrece a Cruz vermella. Este programa está pensado para todas aquelas persoas que viven soas que queren dispor as 24 horas do día e os 365 días do ano, dunha resposta inmediata en calquera situación de emerxencia ou de necesidade derivada desta. Tan só hai que apertar un botón e inmediatamente poderá establecer contacto directo coa central receptora. Esta daralle a resposta máis adecuada ás necesidades de cada usuario/a e activará todos os recursos operativos e loxísticos tanto da súa contorna como da propia Cruz Vermella.

Esta charla impartirase este mércores, 23 de novembro, ás 19:30 horas, no local social da Asociación de Xubilados e Pensionistas do Milladoiro (JUPEMI), que está situado na rúa Figueiras. Esta actividade, que está aberta a todo o público que queira asistir, está encadrada dentro do programa de envellecemento activo do Concello de Ames.