[13-03-2017] O pasado venres, 10 de marzo, o auditorio da Casa da Cultura de Bertamiráns acolleu a fase de zona do Club de Debate, onde participaron cinco equipos de Ames (tres do IES do Milladoiro e dous do IES de Bertamiráns) e dous de Santiago de Compostela (IES da Pontepedriña e a Compañía de María). Arredor de 70 estudantes (de terceiro e cuarto de ESO e de primeiro de Bacharelato) acompañados de 7 profesores/as que foron os seus preparadores debateron sobre se debemos acoller ás persoas refuxiadas. O grupo número 1 do IES de Bertamiráns e o equipo do IES da Pontepedriña foron os gañadores desta fase de zona.
O concello de Ames acolleu por terceira vez a fase de zona do Club de Debate despois de facelo nos anos 2013 e 2015. Foi unha xornada de moitos nervios para o alumnado participante, pero na que aprenderon moito e coñeceron nova xente. O xurado eloxiou o nivel dos debates e mostrou a súa admiración por uns rapaces e rapazas tan novos que foron capaces de defender con astucia e convencemento argumentos a favor e en contra sobre o tema que se lles propuxo.
Ao remate da xornada déronse a coñecer as puntuacións finais. O equipo A (grupo número 2 do IES de Bertamiráns preparado por Diego Rojo) obtivo 288,50 puntos; o equipo B (grupo Concienciados do IES do Milladoiro preparado por Antonio Puentes) conseguiu 235,50 puntos; o equipo C do colexio plurilingüe de Compañía de María, preparado por Beatriz Pérez, sumou 233 puntos; o equipo D (grupo 3 do IES do Milladoiro preparado por María Xosé Rivas), obtivo 287,50; o equipo E (grupo número 1 do IES de Bertamiráns preparado por Carlos Negro) tivo 352 puntos; o equipo F (grupo do IES da Pontepedriña preparado por Mariló Langarón e Mari Carmen García) conseguiu 429,50 puntos; e o equipo G (grupo Vagalume do IES do Milladoiro preparado por María López) acadou 265 puntos.
Deste xeito, os equipo gañadores da fase de zona do Club de Debate foron o grupo do IES da Pontepedriña, preparado por Mariló Langarón e Mari Carmen García, con 429,50 puntos, e o grupo número 1 do IES de Bertamiráns preparado por Carlos Negro que obtivo 352 puntos. A puntuación conseguida por cada grupo foi comunicada pola presidenta do xurado, Valentina Formoso, profesora de ensino secundario. O resto de compoñentes do xurado foron a xornalista, Inés Dopazo; a profesora de ensino secundario, Merche Espiño; a lingüista do Diario Oficial de Galicia, María Xosé Quintáns; e mais o técnico de normalización lingüística da Universidade de Santiago de Compostela, Manuel Bermúdez.
Final galega
Os dous primeiros equipos clasificados en cada unha das zonas participarán na final galega, que terá lugar o sábado, 6 de maio, no Centro Social de Santa Marta, en Santiago de Compostela. O premio final que agarda ao equipo gañador é unha viaxe multiaventura dunha fin de semana, para un máximo de 20 persoas, na que terán ocasión, entre outras cousas, de achegárense ao patrimonio lingüístico a través de actividades lúdicas nas que o idioma terá un papel fundamental, en coherencia co obxectivo principal do proxecto, que é promover o uso da lingua oral nos contextos formais e informais. En consonancia tamén con este obxectivo, o tema sobre o que debaterán na final é "O futuro da lingua está na mocidade”.
