Este venres, 6 de xuño, o grupo municipal de teatro de Ames representará a súa última produción Tromparia no auditorio da Casa da Cultura do Milladoiro. A actuación terá lugar a partir das 21:00 horas. As entradas para ver esta obra de teatro son gratis e poderanse adquirir ata completar aforo.

Despois de representar a obra do italiano Goldoni, indagar no absurdo da man do alemán Karl Valentín, atreverse con Nunca nada de ninguén da autora portuguesa Luísa Costa Gomes, representar a obra O porvir está nos ovos, de Eugéne Ionesco, poñer en escena a comedia O Médico a paus, de Molière, representar a obra Véndese, unha adaptación feita do texto Segunda mano de Dulce Chacón, agora o grupo municipal de teatro de Ames representa Tromparia.

Tromparia é a crónica anacrónica dun tempo e lugar imprecisos, pero presentes por recoñecibles. E neste xogo de luces e sombras de xalundes, transitamos polas cociñas do poder de Tromparia onde se fornean os plans económicos e as vidas dos cidadáns. Mentres o pobo, o protagonista da democracia, prefire resignarse nunha vida de cans diante da vertixe de teren que ser actuantes dun sistema que só coñecían de nome. Pero é que é tan cómodo o servilismo, delegar as decisións e o poder no letargo da vontade, sermos gobernados por alguén -quen for- e que nos deixen tranquilos. Que para iso pagamos impostos!

Esta peza teatral está dirixida por Mónica Camaño. O deseño do espazo escénico, o aderezo e o vestiario correu a cargo da propia Mónica Camaño e dos actores e actrices que participan nesta peza teatral, mentres que o deseño de iluminación ten a firma de Ze Paredes, que xa preparou as seis últimas montaxes do grupo. O elenco artístico está composto por Paula Castro, Maica Couto, Pilara Gómez, Carlos Labraña, Emilia Mayo, Pablo Nimo, Carmela Pardal, Manel Pardo, Patricia Quintiá e Paz Romai. Por último, o soporte técnico é traballo de Kachet Loxística Espectacular SL.